Пазеляніце ручку
11:09, — Грамадства
Савет міністраў зацвердзіў палажэнне аб парадку пакрыцця страт аб'ектаў расліннага свету, размешчаных на землях населеных пунктаў. Цяпер арганізацыі і нават грамадзяне (падчас будаўніцтва ўласнага дому, лецішча і г.д.), перш чым выдаліць дрэва, хмызняк і нават травяное покрыва, абавязаныя атрымаць спецыяльны дазвол выканкама і пакрыць у мясцовы бюджэт кошт дадзенай расліннасці. Усё гэта яшчэ больш павялічыць сабекошт будаўніцтва аб'ектаў нерухомасці, бо плаціць давядзецца не толькі за кожнае дрэва, але нават за загубленую кветку.
Магчымасць спаганяць плату за выдаленне розных раслінных аб'ектаў з'явілася ўлетку гэтага года. Тады былі занесеныя змяненні ў Закон РБ «Аб раслінным свеце». Дададзены артыкул 601 (пакрыццё страт аб'ектаў расліннага свету, размешчаных на землях населеных пунктаў) вызначаў, што страты пакрываюцца мясцоваму выканаўчаму і распарадчаму органу юрыдычнай асобай або грамадзянінам, у інтарэсах якіх выдаляюцца аб'екты расліннага свету ў населеным пункце, паведамляе «Ежедневник».
Прычым пакрыццю падлягае цалкам правамернае выдаленне раслінных аб'ектаў. Напрыклад, пры будаўніцтве новых будынкаў, рамонце старых, пры акультурванні дачнага ўчастку, і нават калі дрэва вырасла там, дзе яно не павінна было вырасці, і перашкаджае нармальнай эксплуатацыі будынка. Памеры гэтых кампенсацыйных выплат, а таксама парадак іх вызначэння ўсталяваў гэтымі днямі Савет міністраў пастановай №1461. Згодна з дакументам, уся расліннасць падзеленая на чатыры групы ў залежнасці ад іх стану (добрае, задавальняючае, дрэннае, неналежнае). Ад гэтага, а таксама ад памеру той ці іншай расліннасці і будзе вызначацца канчатковы кошт кампенсацыйных выплат дзяржаве. Напрыклад, за выдаленне адной елкі пярокругам да 4 см (пры замеры на вышыні 1,3 м), якая знаходзіцца ў добрым стане, давядзецца заплаціць дзяржаве дзве базавыя велічыні, то бок, 72 тыс.рублёў. І нават калі гэтая елка знаходзіцца ў дрэнным стане (фактычна загінула 50 і больш працэнтаў ігліцы), дзяржаве неабходна будзе заплаціць 31 тыс. рублёў. За добрае іглічнае дрэва пярокругам 30 см і больш дзяржаве давядзецца заплаціць 465 тыс. рублёў.
