Адмена ільгот закране 5 мільёнаў беларусаў

Нарада ў кіраўніка беларускай дзяржавы па пытаннях аказання адраснай сацыяльнай дапамогі насельніцтву адкладалася ўжо двойчы. З чым звязаны перанос абмеркавання на вышэйшым узроўні гэтага вельмі важнага пытання і якія наступствы можа выклікаць затрымка з вырашэннем пытання аб адраснай сацыяльнай дапамозе?

«Хоць улады і заяўляюць, што інтарэсы ўсіх неабароненых пластоў насельніцтва – пенсіянераў, інвалідаў, студэнтаў надзейна абароненыя, верагодна, ёсць прарэхі, вузкія месцы. Бюджэт не дазваляе быць такімі аптымістамі, якімі з'яўляюцца сябры ўрада», выказаў «Завтра твоей страны» свой пункт гледжання кіраўнік Беларускага кангрэса дэмакратычных прафсаюзаў Аляксандр Ярашук.

На думку прафсаюзнага лідэра, не так лёгка знайсці крыніцы для матэрыяльнага ўвасаблення такіх заяў. Як вядома, у выніку прыняцця закона аб адмене ільгот дадаткова ў бюджэт павінны паступіць 150-160 мільярдаў рублёў, а на адрасную дапамогу, калі верыць ураду, плануецца вылучыць каля 60 мільярдаў. «Што тычыцца эканоміі, тут усё зразумела, а вось з пераразмеркаваннем сродкаў, верагодна, узніклі праблемы», – мяркуе Аляксандр Ярашук.

«У вярхах няма адзінага меркавання з нагоды таго, што рабіць з будучымі наступствамі прыняцця закона аб адмене ільгот. Яны не распрацавалі план дзеянняў па мінімізацыі наступстваў закона, няма неабходнага дакумента, які мог бы знізіць градус чалавечага абурэння і ўвесці народ у зман», – адзначае лідэр ліквідаванай уладамі Беларускай партыі працы Аляксандр Бухвостаў.

З другога боку, на думку Аляксандра Бухвостава, у дзяржаве няма сродкаў для аказання адраснай дапамогі. «Сацыяльная палітыка правальваецца, і тое, што яны адмянілі ільготы, гаворыць пра антысацыяльную скіраванасць дзяржавы. Бо закранутыя не толькі ільготы, але і гарантыі, замацаваныя ў Канстытуцыі, у тым ліку, і на нармальнае пенсійнае забеспячэнне», – сцвярджае палітык.

Закон аб адмене ільгот уступіць у сілу 17 снежня. Але, як лічаць эксперты «Завтра твоей страны», людзі не адразу адчуюць на сабе наступствы яго прыняцця.

На думку Ярашука, у грамадстве не адразу будуць нейкія сацыяльныя страсанні ўзмацненне сацыяльнай напружанасці. «Найбольш праблемныя месцы ўлады паспрабуюць закрыць, інтарэсы найменш абароненых пластоў грамадства будуць у нейкай ступені ўлічаныя, і ў грамадстве яшчэ не паспеў патэнцыял, які мог бы сфармаваць сур'ёзную незадаволенасць, якая пагражае дэстабілізацыяй сітуацыі», – мяркуе прафсаюзны лідэр.

З другога боку, «бачнае пагаршэнне эканамічнай сітуацыі, узнікненне эканамічных цяжкасцяў, і можна казаць пра тое, што такі патэнцыял будзе фармавацца. Але калі гэта адбудзецца, сцвярджаць пакуль складана», гаворыць Аляксандр Ярашук.

На думку Аляксандра Бухвостава, «наступствы прыняцця гэтага закона ў большай ці меншай ступені закрануць пяць мільёнаў насельніцтва краіны: студэнты, пенсіянеры, інваліды, іншыя пласты насельніцтва адчуюць, што жыць стала больш складана. Як вынік, у грамадстве пашырэе база сацыяльнага пратэсту і негатыўнага стаўлення да ўлады», – лічыць палітык.

Бухвостаў перакананы, што «народ пачне адчуваць негатыўныя наступствы бліжэй да вясны, а гэта можа адбіцца на будучых палітычных кампаніях, якія чакаюць у Беларусі. Уладам будзе цяжэй фальсіфікаваць вынікі выбараў, таму што ўзлаванасць людзей будзе ўсё больш яўная». Таму ўказ Лукашэнкі аб адраснай сацыяльнай дапамозе і ставіць мэтай нівеляваць негатыўныя наступствы закона, але, як мяркуе эксперт, пакуль гэтае пытанне не вырашанае.