Новы генпракурор ЗША – выхадзец з Беларусі
4
9:25, — Грамадства
Сенат Кангрэса ЗША зацвердзіў у чацвер на пасаду міністра юстыцыі і адначасова генеральнага пракурора былога федэральнага суддзю Майкла Мукасея (Michael Mukasey). Ён замяніў Альберта Гансалеса, які пайшоў у адстаўку ў жніўні.
Джордж Буш высунуў кандыдатуру 66-гадовага Мукасея ў сярэдзіне верасня. Пры гэтым ён адзначыў, што Мукасей, які працаваў цягам 18 гадоў суддзёй у Паўднёвай акрузе Нью-Ёрка і выносіў вердыкты па справах тэрарыстаў, "ведае, як трэба эфектыўна супрацьстаяць тэрарызму, прычым рабіць гэта ў поўнай адпаведнасці з нашымі законамі". Дэмакраты ў Кангрэсе тады выказалі надзею, што Мукасей будзе служыць народу, а не прэзідэнту ЗША.
У Мукасея – беларускія карані. Ён нарадзіўся 28 ліпеня 1941 года ў Нью-Ёрку. Сярэднюю адукацыю атрымаў у артадаксальнай габрэйскай школе Рамаз на Манхэтэне. Як раней паведамляў прэс-цэнтр Хартыі’97, бацька Мукасея нарадзіўся і жыў у мястэчку пад Баранавічамі.
Пасля заканчэння Калумбійскага ўніверсітэта і школы права Ельскага ўніверсітэта ў 1967 годзе Мукасей стаў займацца адвакацкай практыкай у нью-ёркскіх юрыдычных фірмах. Пасябраваў у тыя гады з другім маладым адвакатам – Рудольфам Джуліані, які, узначаліўшы пракуратуру Нью-Ёрка, зрабіў яго сваім памочнікам. Мукасей прапрацаваў на гэтай пасадзе 4 года.
Федэральным суддзёй ён быў прызначаны ў 1987 годзе прэзідэнтам Рэйганам. Старшынстваваў, у прыватнасці, на працэсе па справе ісламістаў, арыштаваных за выбух бомбы ў падземным гаражы нью-ёркскага Сусветнага гандлёвага цэнтра ў 1993 годзе, і прысудзіў да пажыццёвага зняволення натхніцеля гэтага тэракту – мулу з Егіпта Амара Абдэль Рахмана.
Пасля таго, як Джуліані ўступіў у барацьбу за крэсла прэзідэнта ЗША, Мукасей з сынам Маркам далучыліся да яго выбарчага штабу ў якасці дарадцаў па юрыдычных пытаннях.
