Арыштаваны Віктар Івашкевіч
3
13:21, — Палітыка
Арыштаваны намеснік старшыні партыі БНФ Віктар Івашкевіч. Палітык быў затрыманы ў той момант, калі ён шоў з Кастрычніцкай плошчы па вуліцы Краснай каля Дома радыё. Івашкевіча адвезлі ў Цэнтральны РУУС Менска.
Нагадаем, на Кастрычніцкай плошчы ў Менску а 12 гадзіне пачаўся мітынг прадпрымальнікаў, у якім бяруць ўдзел прыблізна тысяча чалавек. Прадпрымальнікі патрабуюць адмены некаторых указаў Лукашэнкі, якія значна ўскладнілі працу прыватнага бізнэсу ў краіне.
На з’ездзе Партыі БНФ, які адбыўся 8 – 9 снежня, Віктар Івашкевіч заклікаў беларусаў выйсці 12 снежня, напярэдадні прыезду ў Менск прэзідэнта Расеі Уладзіміра Пуціна, на Кастрычніцкую плошчу Менска.
"У сувязі з тым, што ёсць небяспека, што прэзідэнт Пуцін будзе ціснуць на Лукашэнку, мы хочам выйсці і прадэманстраваць, што ў Беларусі шмат людзей, якія ніколі не пагодзяцца на страту незалежнасці. Спадзяюся, што ўлады не будуць мяшаць волевыяўленню беларускіх грамадзян і заклікаю ўсіх журналістаў і дыпламатаў пракантраляваць, наколькі былі цывілізаваныя паводзіны ўлад", – сказаў Віктар Івашкевіч у інтэрв'ю прэс-цэнтру Хартыі’97.
На думку палітыка, яго сённяшні арышт павінен быць ацэнены міжнароднай супольнасцю, як праява недэмакратычнасці паводзін улад і як увасабленне таго, наколькі яны здольныя ісці на дыялог з Еўропай.
