Улада ў чаканні сацыяльных пратэстаў
1
11:23, — Палітыка
Берасцейскія актывісты аб'яднаных дэмакратычных сілаў атрымліваюць адмовы гарвыканкама на правядзенне 16 снежня пікетаў супраць адмены сацыяльных ільгот.
Паводле дадзеных на раніцу 11 снежня, з 64 заявак на правядзенне пікетаў у абласным цэнтры на шэсць ужо атрыманыя адмовы, паведаміла БелаПАН першая сакратарка берасцейскага гаркама Партыі камуністаў Беларускай (ПКБ) Людміла Дзенісенка.
Ва ўсіх аднатыпныя адказы: "Адмоўлена ў правядзенні мерапрыемства па дадзеным адрасе ў адпаведнасці з артыкулам 5 закона "Аб масавых мерапрыемствах у Рэспубліцы Беларусь" (артыкул рэгламентуе форму заяўкі на правядзенне пікету) і з рашэннем гарвыканкама пра азначэнні нязменнага месца для правядзення масавых мерапрыемстваў у Берасце".
Па словах Л. Дзенісенкі, пікеты, на правядзенне якіх была атрыманая адмова, планаваліся ля буйных гандлёвых аб'ектаў горада. А адзіным дазволеным месцам для правядзення ў Берасце грамадска-палітычных масавых мерапрыемстваў з'яўляецца стадыён "Лакаматыў".
"Мы падалі тры заяўкі на правядзенне пікетаў і на стадыёне, але пакуль адказы на іх не атрымалі. Але я не выключаю, што службоўцы і ў іх "знойдуць" якія-небудзь парушэнні. На маю думку, улада проста баіцца масавых выказванняў пратэсту супраць адмены сацыяльных ільгот і згортвання сацыяльных праграм. Па нашых прагнозах, у выпадку правядзення ўсіх заяўленых пікетаў, у Берасце адбылася б буйнамаштабная акцыя пратэсту. Бо закон "Аб дзяржаўных сацыяльных ільготах, правах і гарантыях для асобных катэгорый грамадзян", які ўступае ў сілу 17 снежня, выклікаў негатыўную рэакцыю практычна ва ўсіх простых людзей", – адзначыла Л.Дзенісенка.
Нагадаем, усяго ў Берасцейскай вобласці былі пададзеныя 130 заявак на правядзенне 16 снежня пікетаў супраць адмены сацыяльных ільгот, у цэлым па Беларусі такіх заявак каля тысячы.
Навіны
па тэме
