Пуцін едзе выкручваць рукі?
58
19:02, — Палітыка
Нечакана абвешчана, што прэзыдэнт Расеі 13–14 сьнежня наведае Менск з афіцыйным візытам — першым за доўгі час.
Візыт адбудзецца за 3 дні да даты вызначэньня кандыдата ад “Адзінай Расеі” на пасаду прэзыдэнта і напярэдадні экстраардынарна раньняга паседжаньня новаабранай Дзяржаўнай Думы. Пра двухдзённы афіцыйны візыт Уладзімера Пуціна ў Беларусь 13—14 сьнежня паведаміў журналістам дзяржаўны сакратар так званай «саюзнай дзяржавы» Павал Барадзін.
14 сьнежня ў Менску мае адбыцца чарговае пасяджэньне вышэйшае дзяржаўнае рады, нагадвае “Наша ніва”.
Са словаў Барадзіна, як перадаюць інфармацыйныя агенцтвы, на паседжаньні будуць абмяркоўвацца, сярод іншага, пытаньні падпісаньня канстытуцыйнага акту саюзнай дзяржавы. Гэты дакумэнт даўно фігуруе ў якасьці праекту, але дагэтуль пытаньні адкладаліся ў доўгую скрыню празь няўзгодненасьць беларускіх і расейскіх інтарэсаў.
Візыт плянуецца як двухдзённы. Гэта таксама незвычайна, як і абвяшчэньне візыту ў апошні момант. Апошнія разы, у прыватнасьці, на саміт СНД, Пуцін прылятаў у Беларусь усяго на пару гадзінаў, і кантакты з кіраўніцтвам Беларусі мелі абмежаваны характар.
Якія мэты мае Пуцін 13—14 сьнежня? Ці гэта толькі палітычны піяр напярэдадні рашэньня аб наступным прэзыдэнце? Ніхто не сумняецца, што расейцы паслухмяна прагаласуюць за кандыдата, вылучанага “Адзінай Расеяй”. Ці гэта нешта большае — спроба падоўжыць палітычнае жыцьцё Пуціна праз наддзяржаўную надбудову саюзу Беларусі і Расеі, праз пасаду прэзыдэнта гэтай пустой, аднак патэнцыйна магутнай структуры? Умацаваньне такой надбудовы несла б пагрозу дзяржаўнаму сувэрэнітэту Беларусі ўжо ў сярэднетэрміновай пэрспэктыве.
Ніхто не разумеў патрэбу агульнанацыянальнай кампаніі праслаўленьня Пуціна, што разгарнулася ўвосень. Такую кампанію звыкла праводзіць кандыдат на пасаду, а тут — прэзыдэнт, які нібыта сыходзіць, каб не парушаць канстытуцыі.
Візыт адбудзецца за 3 дні да даты вызначэньня кандыдата ад “Адзінай Расеі” на пасаду прэзыдэнта (17 сьнежня) і напярэдадні экстраардынарна раньняга паседжаньня новаабранай Дзяржаўнай Думы.
Ніхто, дарэчы, не разумеў таксама, чаму прэзыдэнт Пуцін запатрабаваў тэрміновага скліканьня Дзяржаўнай Думы, абранай 3 сьнежня. Між тым Дума здольная апэратыўна ратыфікаваць нейкія пагадненьні, якія мяркуецца падпісаць у Менску.
Вэрсію аб тым, што 13—14 сьнежня Беларусь чакаюць ціск і выкручваньне рук з боку Расеі, варта разглядаць усур’ёз.
Напісаць каментар (58)
