Сабраныя 40 тысяч подпісаў за змяненне закона аб рэлігіі
9:45, — Рэлігія
Каля 40 тысяч подпісаў сабраныя за занясенне змянення ў рэлігійнае заканадаўства. Пра гэта паведаміў прэс-сакратар кампаніі па абароне правоў на свабоду сумлення Сяргей Луканін.
У інтэрв'ю БелаПАН ён падкрэсліў, што гэтыя правы грамадзян адлюстраваныя ў законах аб свабодзе сумлення і рэлігійных арганізацыях, аб знаходжанні замежных грамадзян на тэрыторыі Беларусі, у адміністрацыйным, грамадзянскім і крымінальным кодэксах, а таксама ў канцэпцыі нацыянальнай бяспекі краіны. "Мы лічым, што неабходна змяніць шэраг артыкулаў аб верніках, якія ўтрымліваюцца ў гэтых прававых актах, бо яны супярэчаць Канстытуцыі і палажэнням шматлікіх міжнародных пагадненняў, ратыфікаваных Беларуссю", – адзначыў С.Луканін.
Паводле яго слоў, толькі за апошнія два тыдні сабраныя больш як 10 тысяч подпісаў. "Пасля таго як актывісты кампаніі збяруць 50 тысяч подпісаў, мы накіруем іх у органы, якія валодаюць заканадаўчай ініцыятывай. Гаворка ідзе, у прыватнасці, пра кіраўніка дзяржавы і «палату прадстаўнікоў»", – сказаў С.Луканін.
Ён адзначыў рост інтарэсу грамадзянскай супольнасці да праблемы свабоды сумлення і веравызнання ў краіне. "Так, з ініцыятывы былога кандыдата на пасаду прэзідэнта Аляксандра Мілінкевіча адбылося пасяджэнне круглага стала з удзелам грамадска-палітычных і рэлігійных дзеячаў. На ім Мілінкевіч заявіў пра тое, што правы вернікаў з'яўляюцца неад'емнай складанай часткай правоў чалавека і іх парушэнне павінна разглядацца міжнароднай супольнасцю на самым высокім узроўні", – сказаў прэс-сакратар кампаніі. Паводле яго слоў, на пасяджэнні круглага стала ў Гародні актывісты кампаніі сустрэліся з прадстаўнікамі ўлады.
"Мы чакаем, што па выніках збору подпісаў кіраўніцтва краіны цвяроза ацэніць цяперашнюю сітуацыю і прыйдзе да разумення неабходнасці выконвання правоў вернікаў. Мы спадзяемся, што для распрацоўкі змяненняў і дадаткаў у заканадаўства будуць створаныя працоўныя групы з прадстаўнікоў улады і грамадзянскай супольнасці", – падагульняе С.Луканін.
