Судамі за Еўрапейскі Марш улада закрывае сабе дарогу ў Еўропу
10:33, — Палітыка
Дэмакратычнага актывіста Леаніда Навіцкага прывезлі сёння ў суд Партызанскага раёна Менска. Разам з ім у суд дастаўленыя яшчэ два актывісты – Аліна Гладкая і Віталь Ціхановіч. Яны былі затрыманыя ў ноч з 21 на 22 верасня. Пры асабістым даглядзе міліцыя знайшла ў іх заплечніках інфармацыйныя матэрыялы кампаніі Еўрапейскі Марш.
Як стала вядома прэс-цэнтру Хартыі’97, Леанід Навіцкі быў арыштаваны 21 верасня за тое, што пры ім былі знойдзеныя сцягі Еўрапейскага Звязу. Актывіст трое сутак знаходзіўся ў спецпрыёмніку-размеркавальніку на Акрэсціна. Актывіста судзяць за падрыхтоўку Еўрапейскага Марша (артыкул 23.34 Кодэкса аб адміністрацыйных правапарушэннях – заклік да ўдзелу ў несанкцыянаваным мерапрыемстве).
Аліна Гладкая і Віталь Ціхановіч правялі двое сутак у спецпрыёмніку-размеркавальніку на Акрэсціна.
Учора ж у Менску быў затрыманы моладзевы актывіст Кастусь Грахаў. Пры ім былі знойдзеныя налепкі Еўрапейскага Марша. Актывіста таксама адправілі ў спецпрыёмнік і маюць намер сёння судзіць.
Дзеянні беларускіх улад выглядаюць дзіўнымі і непаслядоўнымі. З аднаго боку, яны заяўляюць пра жаданне нармалізаваць стасункі з Еўразвязам, з другога боку – развязваюць рэпрэсіі супраць уласных, па-праеўрапейску настроеных, грамадзян.
Нагадаем, што апазіцыя прапанавала ўладам правесці Еўрапейскі Марш сумесна. Мірнае правядзенне Марша адкрые перад Беларуссю, якая апынулася на мяжы эканамічнага крызісу, перспектывы супрацоўніцтва з Еўразвязам.
