Мытня пачала размаўляць на беларускай мове
11:20, — Грамадства
Ці паступалі дэклярацыі на беларускай мове на мытню гарадзенскага чыгуначнага вакзалу? Гэта вырашылі высьветліць журналісты “Радыё Свабода”.
Раней дэклярацыі можна было атрымаць адразу перад уваходам у залю мытнага догляду. Цяпер, як вядома, усім пасажырам афармляць іх неабавязкова. Мытнік заўсёды сам пытаецца, ці ёсьць вам што дэкляраваць, і толькі тады выдае блянкі.
Журналіст зацікавіўся наконт беларускамоўных дэклярацый. Атрымалася такая размова:
Мытніца: “Так, канешне, такія дэклярацыі паступілі, яны ёсьць”.
Карэспандэнт: “Можна паглядзець?”
Мытнік (па-беларуску): “Калі ласка, паглядзіце”.
Мытная дэклярацыя — “запаўняецца кожнай асобай, дасягнуўшай шаснаццацігадовага ўзросту”, у яе заносяцца “зьвесткі аб асобе”, “зьвесткі аб наяўнасьці багажу”, “зьвесткі аб наяўнасьці тавару”.
Журналіст “Радыё Свабода” таксама атрымаў камэнтар у дзяжурнага на мытні на гарадзенскім вакзале, ды яшчэ — на беларускай мове:
Карэспандэнт: “Скажыце: раней, калі дэклярацыі трэба было запаўняць абавязкова, на вакзале былі блянкі толькі на расейскай мове, вам гэта не перашкаджала, ці не ўзьнікала праблемаў з мытнікамі?”
Малады спадар: “Ды, не: папросту пішаш па-беларуску і ўсё”.
Карэспандэнт: “А мытнікі, якой была іхняя рэакцыя, ці не было ніякай рэакцыі?”
Малады спадар: “Не, праблемаў ніякіх сапраўды не было, яны ж таксама вучыліся ў нашых школах, вывучалі беларускую мову. Табе давалі дэклярацыю на расейскай мове, ты пішаш на беларускай і ўсё. Але гэта вельмі прыемна, калі ў рэшце рэшт праз столькі год у нашай незалежнай краіне зьявіліся блянкі мытных дакумэнтаў на беларускай мове”.
