Бухгалтары менскага ўпраўлення адукацыі выкралі 100 тысяч даляраў

Паводле матэрыялаў следства, бухгалтары ўпраўлення адукацыі адміністрацыі Фрунзенскага раёна Менска, карыстаючыся службовымі паўнамоцтвамі, па папярэдняй змове рыхтавалі падробленыя бухгалтарскія дакументы і падавалі іх у банк на атрыманне зарплаты для сябе. З фондаў эканоміі заработнай платы дашкольных і школьных устаноў Фрунзенскага раёна яны залічалі на свае асабістыя карт-рахункі прэміі і за тры гады выкралі звыш як Br 210 млн (каля 100.000$).

Цяпер усе падазраваныя знаходзяцца пад падпіскай аб нявыездзе, вядзецца следства. Паводле крымінальнага заканадаўства, за крадзеж шляхам злоўжывання службовымі паўнамоцтвамі ў адмыслова буйным памеры службовым асобам пагражае пакаранне ў відзе пазбаўлення свабоды ад 5 да 12 гадоў з канфіскацыяй маёмасці і пазбаўленнем права займаць пэўныя пасады, паведамляе БелТА са спасылкай на афіцыйныя крыніцы.