Давос зноў адкрываецца без нас
10:39, — Эканоміка
Сёння адкрываецца сусветны эканамічны форум у Давосе. Галоўнай тэмай мерапрыемства стане сусветны фінансавы крызіс, нарастаючая роля дзяржаўных інвестыцыйных фондаў і рост цэн на рынку харчавання. Форум пройдзе з 23 па 27 студзеня.
Сёлета на форум, які пройдзе пад дэвізам "Сіла інавацыйнага супрацоўніцтва", збяруцца больш як 2,5 тыс. удзельнікаў з 88 краін, у тым ліку 27 кіраўнікоў дзяржаў і ўрадаў, 113 міністраў, прадстаўнікі вядучых міжнародных арганізацый і грамадскія дзеячы з усіх рэгіёнаў свету. Сярод сустаршыняў форума – экс-прэм'ер Вялікабрытаніі Тоні Блэр і былы дзяржсакратар ЗША Генры Кіссінджэр.
Сусветная бізнэс-супольнасць будзе прадстаўленая на форуме 1370 кіраўнікамі найбуйнейшых кампаній, у тым ліку 74 з 100 кіраўнікоў транснацыянальных карпарацый, якія ўваходзяць у "першую сотню" па рэйтынгах самых прэстыжных эканамічных выданняў.
Кіраўнікі 20 вядучых краін запрашаюцца на саміт аўтаматычна. Беларусь ні ў "аўтаматычны" спіс, ні ў спіс спецыяльна запрошаных не ўваходзіць.
Сярод тэм саміту будуць дамінаваць эканамічныя праблемы – наступствы крызісу на рынку высокарызыкоўнай іпатэкі, перамяшчэнне капіталу ад краін-спажыўцоў да краін – вытворцаў энергіі, інфляцыйныя тэндэнцыі, – мяркуе заснавальнік СЭФ Клаўс Шваб.
Арганізатары форума вызначылі пяць асноўных тэм дыскусій, якія маюць адбыцца: "Эканоміка і фінансы – шляхі пераадолення нестабільнасці"; "Бізнэс: супрацоўніцтва ва ўмовах канкурэнцыі"; "Геапалітыка: узгадненне агульных інтарэсаў, пераадольваючы рознагалоссі"; "Навука і тэхналогія: аптымізацыя выкарыстання прыродных умоў з улікам апошніх дасягненняў навукі"; "Грамадскія каштоўнасці: аналіз будучых перамен".
Клаўс Шваб лічыць заўчасным казаць пра крызіс у сусветнай эканомікі. Паводле яго слоў, тэмпы росту запаволіліся толькі на 3,5% супраць прагназаваных 5%.
Адмысловую ўвагу сёлета прыцягвае ўдзел у Давоскім форуме прэзідэнта Украіны Віктара Юшчанкі. Гэта абумоўленае не толькі тым, што краіна перажывае ў апошнія гады сур'ёзныя палітычныя перабудовы, але і тым, што форум супадае па часе з чаканым 25 студзеня рашэннем Сусветнай гандлёвай арганізацыі аб прыняцці Украіны ў сябры СГА. У Юшчанкі прадугледжаныя больш як 15 двухбаковых сустрэч з кіраўніцтвам краін – удзельніц форума.
На сённяшнім першым пленарным пасяджэнні форума будуць абмеркаваныя праблемы глабальных кліматычных перамен і барацьбы з тэрарызмам. Свой аналіз становішча ў "гарачых кропках" планеты прадставіць дзяржсакратар ЗША Кандаліза Райс.
