Навабранцаў таксама пазбавілі льгот (фотафакт)

Сябры, знаёмыя і сваякі беларускіх прызыўнікоў апынуліся сярод тых, каго з 17 снежня 2007 года таксама пазбавілі ільгот.

У Беларусі ідзе прызыў на воінскую службу. У рамках агітацыйна-прапагандысцкага забеспячэння гэтай кампаніі з старонак дзяржаўных сродкаў масавай інфармацыі нямала гаворыцца пра адданасць воінскаму абавязку, ваеннай прысязе і святасць абавязку абараняць Радзіму. Між іншым, пасля 17 снежня беларускія грамадзяне, чые сябры або сваякі выконваюць гэты «святы абавязак», адпраўляючы лісты салдатам, сутыкнуліся з тым, што з гэтага часу на салдацкі ліст неабходна наляпляць марку.

Здавалася б дробязь, але… Калі ўлічыць усе нюансы палітыка-эканамічнага сэнсу пазбаўлення салдацкай сям'і (чытай: нявесты, сябры, дзядзькі, цёткі, бабулі, дзядулі…) ільготы на права бясплатна адправіць вестачку абаронцу Бацькаўшчыны, то высновы можна зрабіць вельмі нават далёка ідучыя.

З аднаго боку – абарона Рэспублікі Беларусь абвешчаная святым абавязкам грамадзяніна. Але з іншага, у краіне даўно няма ўсеагульнага воінскага абавязку.

Сама дзяржава сарамліва называе гэта конкурсам, па выніках якога ў салдацкі строй становяцца пераважна… дзеці працоўных і сялян, то бок, і без таго найменш забяспечаных грамадзян.

Калі хутка адны служаць Радзіме, а іншыя гэтым часам зарабляюць грошы, дзяржава павінна кампенсаваць гэта. Напрыклад, шляхам павелічэння грашовага ўтрымання салдат, падаванні ім ільгот пры паступленні ў ВНУ або гарантый працаўладкавання.

Замест гэтага, у працэсе пошуку рэзерваў улада дайшла да таго, што вырашыла зэканоміць на паштовых марках. Пазбавіўшы, такім чынам, сем'і салдат стагоддзямі (!) існуючай льготы.

Дарэчы, як піша газета «Товарищ», ва ўсіх паштовых аддзяленнях, каб пазбегнуць непаразуменняў, спецыяльна вывешаны плакат-улётка.