У Менску абрабаваная ювелірная крама, а ў Крупках – запраўка
13:05, — Крымінал
З менскай ювелірнай крамы выкралі каштоўнасцяў на 24 мільёны рублёў. Па гэтым факце заведзеная справа па ч. 3 арт. 205 Крымінальнага кодэкса (крадзеж) у Савецкім РУУС Менска.
Паводле інфармацыі ГУУС Менгарвыканкама, пра злачынства ў міліцыю паведаміла 25 студзеня бухгалтар адной з сталічных фірм. Жанчына заявіла, што ў гэты дзень з 10.00 да 17.00 у ювелірнай краме па вуліцы Куйбышава невядомы, падабраўшы ключ да замка вітрыны, здзейсніў крадзеж трох залатых бранзалетаў коштам 23.802.270 рублёў, паведамляе БелаПАН.
Учора супрацоўнікі крымінальнага вышуку РУУС Крупскага раёна Менскай вобласці затрымалі дваіх раней судзімых жыхароў Талачынскага раёна па падазроне ў здзяйсненні разбойнага нападу на АЗС, паведамляла "Інтэрфаксу" ў панядзелак оперупаўнаважаны па адмыслова важным справам упраўлення крымінальнага вышуку Галоўнага ўпраўлення крымінальнай міліцыі міністэрства ўнутраных спраў Беларусі Уладлена Харытонава.
"У міліцыю паступіла паведамленне пра тое, што невядомыя ў масках, разбіўшы драўлянай бітай акно, забраліся ў будынак АЗС нумар 76 канцэрна "Белнафтахім" у Крупскім раёне", паведаміла У.Харытнова. Паводле яе слоў, "зламыснікі, пагражаючы аператару АЗС прадметам, падобным на пісталет, выкралі з касы Br4 млн, 11,5 тысячы расейскіх рублёў, 731 даляр ЗША, 460 еўра і ўцяклі".
Супрацоўнікі міліцыі па падазроне ў здзяйсненні дадзенага разбойнага нападу затрымалі дваіх раней судзімых жыхароў Талачынскага раёна, у дачыненні іх узбуджаная крымінальная справа па арт. 207 "Разбой" Крымінальнага кодэкса Беларусі, выкрадзенае канфіскаванае, падазраваныя змешчаныя ў ізалятар часовага ўтрымання, сказала прадстаўніца МУС.
