Лукашэнка: «2008 год будзе складаным»

Аляксандр Лукашэнка лічыць, што 2008 год стане няпростым для Беларусі, і заклікае актыўна ўзяцца за працу пасля святаў. "Гэты год будзе не простым – ён будзе складаным. Але не таму, што цэны на газ і нафту будуць расці, не таму, што нам чагосьці будзе бракаваць – так развіваецца свет", – заявіў у панядзелак у Менску ў Свята-Духавым кафедральным саборы Лукашэнка, дзе праходзіла каляднае набажэнства.

Беларускі кіраўнік падкрэсліў, што краіна ў 2008 годзе павінна здзейсніць значны рывок у эканамічным развіцці. Пры гэтым ён падкрэсліў, што "гэтага патрабуе жыццё". У гэтым звязку А.Лукашэнка звярнуўся з просьбай "не апускаць рукі, а пасля святаў актыўна ўзяцца за працу".

А.Лукашэнка асобна адзначыў, што 2008 год будзе вызначальным годам у гэтай пяцігодцы. Ён звярнуў увагу на тое, што перад краінай сёлета стаяць цяжкія задачы, якія неабходна выканаць.

Між іншым, А.Лукашэнка зазначыў, што "было б прасцей, калі б не было ціску з боку канкурэнтаў". У той самы час А.Лукашэнка выказаў здагадку, што заканамернае ўзнікненне супраціву новай дзяржаве, якім з'яўляецца Беларусь, з боку іншых краін. Паводле яго слоў, у выніку гэтага супраціву і ўзнікае ціск. У той самы час А.Лукашэнка звярнуў увагу на тое, што часам такі ціск несправядлівы.

На погляд Лукашэнкі, "моцныя свету гэтага" не любяць, калі меншыя дзяржавы пачынаюць пра сябе заяўляць. "Трэба спакойна на гэта глядзець і рабіць сваю справу", – перакананы Лукашэнка. Паводле яго слоў, ён сам менш стаў рэагаваць на такі ціск.

А.Лукашэнка таксама заявіў, што перад краінай стаіць задача значнага паляпшэння дабрабыту народа. Беларускі кіраўнік адзначыў, што, паводле прагнозаў сусветных экспертаў, у гэтым годзе працягнецца рост цэнаў на харчаванне. У гэтым звязку ён зазначыў, што рост цэнаў на харчаванне выгодны Беларусі з пункту гледжання экспарту.

А.Лукашэнка таксама звярнуў увагу на неспакойную сітуацыю і развіццё канфліктаў у свеце. У гэтай сувязі ён адзначыў неабходнасць усцерагчы Беларусь ад гэтых негатыўных тэндэнцый. "Мы не можам упусціць смуту, несправядлівасці, якія існуюць вакол, у наш дом".