Выконваць рэкамендацыі МАП прыйдзецца
9:04, — Палітыка
Асноўныя спрэчкі паміж урадам і незалежнымі прафсаюзамі ў 2008 годзе будуць разгортвацца вакол выканання рэкамендацый Міжнароднай арганізацыі працы. Такое меркаванне ў інтэрв'ю БелаПАН выказаў старшыня Беларускага кангрэса дэмакратычных прафсаюзаў (БКДП) Аляксандр Ярашук.
«Мы не маем вялікіх ілюзій, што ўрад будзе выконваць рэкамендацыі, каб палепшыць стасункі з Еўразвязам і вярнуць эканамічныя прэферэнцыі, – сказаў А.Ярашук. – Хутчэй за ўсё, тут будзе сцэнар такой, як і ў папярэднія гады: шмат запэўненняў, абяцанняў, спроб маніпуляцый, каб упэўніць МАП і ЕЗ, што рэкамендацыі МАП здзяйсняюцца цалкам паспяхова».
На думку кіраўніка БКДП, у 2008 годзе будуць рабіцца спробы прыняцця новай рэдакцыі закона «Аб прафесійных звязах», і ўсякі раз «з кіўкамі ў бок Міжнароднай арганізацыі працы, што закон цалкам дэмакратычны».
«Мы будзем і далей змагацца за тое, каб усе 12 рэкамендацый МАП былі выкананыя», – падкрэсліў А.Ярашук.
У 2003 годзе Адміністрацыйная рада МАП прыняла рашэнне аб пачатку расследавання ў сувязі з скаргай беларускіх незалежных прафсаюзаў. Спецыяльная камісія аналізавала захаванне беларускім урадам канвенцый МАП «Аб свабодзе аб'яднання і абароне права на арганізацыю ў прафсаюзы» і «Аб праве на арганізацыю ў прафсаюзы і на вядзенне калектыўных перамоваў». Сітуацыя ў Беларусі разглядалася таксама на пасяджэнні Камітэта па нормах і стандартах МАП у рамках 95-ай Міжнароднай канферэнцыі працы ў Жэневе. У выніку 8 чэрвеня 2007 года Беларусь у пяты раз была занесеная ў спецпараграф дакладу Міжнароднай канферэнцыі працы як краіна, дзе парушаюцца правы прафсаюзаў. На пленарным пасяджэнні Адміністрацыйнай рады Міжнароднай арганізацыі працы 14 лістапада ў Жэневе было прынятае рашэнне вярнуцца да абмеркавання сітуацыі ў Беларусі на вясновай сесіі МАП у сакавіку 2008 года.
У чэрвені 2007 года Беларусь была выключаная з генеральнай сістэмы тарыфных прэферэнцый ЕЗ за сістэматычнае парушэнне правоў прафсаюзаў.
