Навошта хапалі?
12
17:30, — Палітыка
Лідэр прадпрымальнікаў Віктар Гарбачоў вызвалены. «Апраўданы за адсутнасцю складу злачынства», – паведаміў прэс-цэнтру Хартыі’97 прысуд Барысаўскага раённага суду актывіст прадпрымальніцкага руху Міхаіл Васільеў.
Як мы ўжо паведамлялі, сёння ў Барысаве праходзіў суд над лідэрам кампаніі «За свабоднае развіццё прадпрымальніцтва» Віктарам Гарбачовым, якога абвінавацілі ў супраціве супрацоўнікам міліцыі. Першапачаткова справу павінен быў разглядаць старшыня Барысаўскага раённага суду Юры Кобец, але ён узяў самаадвод, спаслаўшыся на асабістае знаёмства з падсудным. Працэс вёў намеснік старшыні суду Мікалай Кананчук.
На судзе супраць Гарбачова сведчыў толькі Сяргей Мікуловіч, адзін з двух супрацоўнікаў міліцыі, якія ўдзельнічаюць у затрыманні. Па словах відавочцаў, сведка-міліцыянт не рабіў спроб ілжэсведчыць, а распавядаў, як усё адбывалася насамрэч. Другі супрацоўнік міліцыі, спаслаўшыся на хваробу сваяка, з'ехаў з горада, адмовіўшыся выступаць у судзе.
Віктар Гарбачоў быў затрыманы раніцай на вакзале, калі з сям'ёй вяртаўся з Крупак дамоў у Барысаў. Пры выхадзе з электрычкі невядомы мужчына стаў прыставаць да В.Гарбачова і яго непаўнагадовага сына, спрабуючы справакаваць бойку. Як толькі да іх сталі набліжацца супрацоўнікі міліцыі, незнаёмец збег.
У Барысаўскім РАУС без тлумачэння прычын у лідэра кампаніі ўзялі аналіз на наяўнасць алкаголю ў крыві. Супрацоўнікі міліцыі дапыталі В.Гарбачова і яго жонку Святлану.
Такім чынам, з пацярпелых В.Гарбачоў стаў абвінавачваным, што калегі прадпрымальніка наўпрост звязваюць з яго грамадскай дзейнасцю. Раней В.Гарбачоў казаў прэс-цэнтру Хартыі’97, што працаўнікі праваахоўных органаў яго папярэджвалі пра тое, што 8–9 студзеня ўлады пастараюцца ізаляваць арганізатараў акцыі пратэсту прадпрымальнікаў, якая павінна прайсці 10 студзеня на Кастрычніцкай плошчы ў Менску.
Напісаць каментар (12)
