Купляць расейскі газ па рынкавай цане Беларусі не па кішэні
8
8:47, — Эканоміка
Выступаючы на Мюнхенскай канферэнцыі, першы віцэ-прэм'ер Расеі прызнаў, што Расея пастаўляе газ Беларусі па таннейшай цане, чым для іншых еўрапейскіх спажыўцоў. "Сёння Еўропа плаціць за тысячу кубаметраў газу 314 даляраў. Лукашэнка сказаў, што ў яго няма такіх грошай", – сказаў Сяргей Іваноў.
Пры гэтым ён адзначыў, што цэны на расейскія энерганосьбіты не залежаць ад знешняй палітыкі Расеі. "Сувязь цэн на нафту і газ з палітыкай? А яе няма", – сказаў Сяргей Іваноў, адказваючы на пытанні ўдзельнікаў канферэнцыі. "Мы нікому не пастаўляем газ бясплатна", – падкрэсліў першы віцэ-прэм'ер Расеі.
Паводле яго слоў, цана на расейскія энерганосьбіты вызначаецца "ўсім вядомай празрыстай рынкавай формулай", перадае "Інтэрфакс".
Паводле пяцігадовага кантракту, падпісанаму 31 студзеня 2006 года, з 2008 года цана на газ для Беларусі будзе вызначацца па формуле, прывязанай да кошту нафтапрадуктаў на еўрапейскіх рынках.
У 2008 годзе яна павінна скласці 67% ад цаны для еўрапейскіх спажыўцоў, у 2009-м – 80%, у 2010-м – 90%, у 2011-м – 100% ад сярэднееўрапейскай цаны на газ за вылікам транспартных выдаткаў. Цяпер Беларусь купляе газ у Расеі па цане 119 даляраў за тысячу кубаметраў.
Сямашка: цана на газ будзе «прымальнай»
Першы віцэ-прэм'ер беларускага ўрада Уладзімір Сямашка паведаміў журналістам 7 лютага 2008 года ў Менску, што па прагнозах беларускага ўрада, кошт расейскага газу ў другім квартале 2008 года застанецца прымальным. Віцэ-прэм'ер нагадаў, што цана 119 даляраў за тысячу кубаметраў – гэта нармальная цана, піша «Тэлеграф».
"Нашы прагнозы адносна цаны на другі квартал цалкам спрыяльныя", – удакладніў Уладзімір Сямашка.
Нагадаем, паводле афіцыйнай інфармацыі цана павялічыцца на 10% і складзе ледзь больш за 130 даляраў за тысячу кубаметраў.
