Кадравая ракіроўка аднагалосна ўхваленая
2
11:56, — Палітыка
«Савет рэспублікі» «нацыянальнага сходу» Беларусі на пазачарговай сесіі 13 лютага даў згоду на прызначэнне старшынёй Канстытуцыйнага суду (КС) Пятра Міклашэвіча, а генеральным пракурорам Рыгора Васілевіча. На загад Лукашэнкі, службоўцаў памянялі месцамі – яшчэ нядаўна Васілевіч узначальваў КС, а Міклашэвіч генпракуратуру.
Галасаванне ў верхняй палаце праходзіла адкрыта. Сябры «савета рэспублікі» аднагалосна прагаласавалі за кандыдатуру Міклашэвіча. Таксама аднагалосна «савет рэспублікі» узгадніў прапанаванае Лукашэнкам прызначэнне былога старшыні Канстытуцыйнага суду Рыгора Васілевіча на пасаду Генеральнага пракурора.
Эксперты даволі скептычна ацэньваюць новыя прызначэнні. «Я разумею, што Канстытуцыйнаму суду ў тым зрэзаным выглядзе, у якім ён цяпер існуе, вельмі цяжка ўплываць на выкананне канстытуцыйных норм у краіне, – сказаў былы суддзя Канстытуцыйнага суду Міхаіл Пастухоў. – Але па-за ўвагай Канстытуцыйнага суду прайшла і адмена льгот для пераважнай большасці нашых грамадзян, і рэферэндум аб адмене абмежавання на колькасць тэрмінаў прэзідэнцтва для аднаго чалавека, і вельмі спрэчны дэкрэт аб увядзенні кантрактнай сістэмы ў Беларусі.
У аналагічнай сітуацыі знаходзіўся і былы кіраўнік Генеральнай пракуратуры Пётр Міклашэвіч, які ніводнага дня не працаваў на пракурорскай працы, які не мае ніякага досведу на ніве барацьбы з злачыннасцю.
Атрымліваецца, пры прызначэнні на найважнейшыя дзяржаўныя пасады важна, найперш, дэманстраваць лаяльнасць да дзейнага кіраўніка дзяржавы і адданасць «лініі партыі».
Навіны
па тэме
