Украіна і ЕЗ пачынаюць перамовы наконт стварэння зоны свабоднага гандлю
10:55, — У свеце
Прэзідэнт Украіны Віктар Юшчанка і камісар Еўрапейскага Звязу па пытаннях гандлю Піцер Мендэльсон абвясцілі пра фармальны пачатак перамоваў аб стварэнні зоны свабоднага гандлю паміж Украінай і ЕЗ.
Як паведамляе Карэспандэнт.net, пра гэта яны заявілі на сустрэчы ў панядзелак у Кіеве.
Юшчанка адзначыў, што на сёння ЕЗ з'яўляецца гандлёвым партнёрам Украіны нумар адзін, і большасць інвестыцый ідзе менавіта з Еўразвяза. Прэзідэнт нагадаў, што ўзровень таваразвароту паміж Украінай і Еўразвязам складае 32 млрд даляраў, што "абавязвае думаць нас пра развіццё стасункаў".
Ён заявіў, што сёння адбываецца знакавая падзея – стартуюць афіцыйныя перамовы аб стварэнні зоны свабоднага гандлю з Еўразвязам.
У сваю чаргу, Мендэльсон зазначыў, што зона свабоднага гандлю павінна стаць асноўным момантам новага ўзмоцненага пагаднення Украіна–ЕЗ. На яго думку, гэта стане важным не толькі для гандлёвых і эканамічных стасункаў, але і для інтэграцыі Украіны ў еўрапейскія структуры.
Пагадненне аб свабодным гандлі паменшыць выдаткі на імпарт з ЕЗ для ўкраінскіх прадпрыемстваў і спажыўцоў, а таксама будзе спрыяць доступу Украіны да адзінага рынку ЕЗ, які з'яўляецца найбуйнейшым у свеце.
Сярод экспартных рынкаў Еўразвяза Украіна цяпер займае 25-ую прыступку. ЕЗ з'яўляецца першым гандлёвым партнёрам Украіны, пасля якога ідзе Расея. У апошнія гады назіраўся стабільны рост аб'ёмаў гандлю паміж ЕЗ і Украінай, якія ў 2006 годзе (у грашовым вымярэнні) склалі 26 млрд. еўра.
Навіны
па тэме
