Статкевіч: Швецыя хацела б бачыць Беларусь у Еўразвязе
1
10:14, — Палітыка
"Швецыя спадзяецца, што Беларусь выканае ўсе ўмовы для ўступлення ў ЕЗ і ў будучым стане яго паўнапраўным сябрам", – заявіў у інтэрв'ю БелаПАН лідэр аргкамітэта па стварэнні Беларускай сацыял-дэмакратычнай партыі (Народная Грамада) Мікола Статкевіч. Так ён пракаментаваў вынікі візіту групы беларускіх палітыкаў у Швецыю 11–14 лютага.
У складзе беларускай дэлегацыі акрамя М.Статкевіча Швецыю наведалі старшыня аргкамітэта па стварэнні Партыі свабоды і прагрэсу Уладзімір Навасяд і старшыня аргкамітэта па стварэнні сацыяльна-грамадскага аб'яднання БХД Павал Севярынец. Па словах М.Статкевіча, сябры дэлегацыі прадстаўлялі Еўрапейскую кааліцыю.
12 лютага дэлегацыя ўзяла ўдзел у семінары, на якім абмяркоўвалася сітуацыя ў Беларусі. Па словах М.Статкевіча, міністр па справах ЕЗ Швецыі Сесілія Мальстрам "паказала выдатнае веданне сітуацыі ў Беларусі, у тым ліку і ў дачыненні палітвязняў".
Палітык таксама адзначыў, што прадстаўнікі беларускай дэлегацыі правялі сустрэчы з сваімі саюзнікамі з шведскіх партый.
"Лічу, мы выканалі мэту паездкі. Па-першае, мы паказалі, што ў Беларусі ёсць палітычныя сілы, якія хочуць бачыць сваю краіну ў ЕЗ. Па-другое, мы можам казаць, што Швецыя таксама хацела б бачыць Беларусь у гэтым звязе", – заявіў М.Статкевіч.
Навіны
па тэме
