Жыхары вуліцы Маркса: «Ніхто нас адсюль ня згоніць» (фота)
5
16:31, — Грамадства
Жыхары вуліцы Маркса ў Менску сёньня выйшлі з пратэстам супраць іх прымусовага адсяленьня на ўскраіны гораду.
2 лютага ў 13.00 ў Менску адбыўся мітынг жыхароў вуліцы Маркса, якія пратэставалі супраць адсяленьня на ўскраіны. Каля кавярні “Грунвальд” сабралася блізу 300 чалавек, піша “Наша ніва”.
Людзі, якія губляюць вялікія грошы ад перасяленьня з даражэйшых кватэраў у таньнейшыя без даплаты, падрыхтаваліся да мітынгу. Яны трымалі самаробныя транспаранты “За пешаходную вуліцу без рабаўнічага высяленьня”, “Аляксандар Рыгоравіч, абараніце пэнсіянэраў”, “Ніхто нас адсюль ня згоніць і ня выстрашыць” (з пазнакай, што гэта цытата з "Раскіданага гнязда" Янкі Купалы).
Пісьменьнік Уладзімер Арлоў, які таксама жыве на гэтай вуліцы, нёс на грудзях і сьпіне плякаты “Толькі ў роднай кватэры напішу бэстсэлер”.
Да людзей выйшлі прадстаўнікі ўлады: намесьнік кіраўніка адміністрацыі Ленінскага раёну Аляксандар Красуцкі, дырэктар УКБ Ленінскага раёну Леанід Казакоўскі і прадстаўнік “Менскпраекту” Рыбнікаў. Чыноўнікі пераконвалі людзей, што праект па высяленьні пакуль не зацьверджаны, што меркаваньні жыхароў будуць улічаныя.
У адказ мітынгоўцы паказалі чыноўнікам копію дакумэнту, у якім значыцца: “жыхары дамоў супраць рэканструкцыі вуліцы і зьмяненьня жылога фонду на грамадзкі, таму плянуецца іх высяленьне”. Дакумэнт падпісаны менавіта тымі чыноўнікамі, якія прыйшлі на сустрэчу. Пасьля кароткай паўзы чыноўнікі прапанавалі сустрэцца яшчэ раз -- у сераду а 19-й, у актавай залі СШ № 4.
Жыхары вуліцы настроеныя рашуча і, паводле іх словаў, “лягуць касьцьмі, але выяждждаць ня будуць”. Кажуць, што адзін з іх, што нядаўна набыў на вуліцы Маркса кватэру, нарабіўшы вялікіх пазык, гатовы нават да самаспаленьня.
Фота Андрэя Лянкевіча
