Памерла Ірына Казуліна
197
21:37, — Палітыка
Жонка палітвязня, экс-кандыдата ў прэзідэнты Аляксандра Казуліна, Ірына, сканала 23 лютага ў 19.40 па менскім часе. 48-гадовая жанчына пакутавала на анкалагічнае захворванне. Ёй рэзка стала дрэнна, «хуткая дапамога» не давезла Ірыну Казуліну да шпіталя….
Як паведаміў прэс-цэнтру Хартыі’97 былы адвакат і сябар сям'і Ігар Рынкевіч, сваякі ўжо паведамілі ў віцебскую калонію пра смерць Ірыны Казулінай. Па законе палітвязень Аляксандр Казулін павінен быць заправаджаны ў Менск для развітання з жонкай.
«Гэта была далікатная і выдатная жанчына. Шмат хто з нас да апошняга не ведалі пра яе страшную хваробу, так яна трымалася, так змагалася за мужа! Яна натхняла на барацьбу нас усіх. Побач з кожным моцным палітыкам заўсёды ёсць вялікая жанчына. Такой вялікай жанчынай і была Ірына Казуліна», – паведаміў Ігар Рынкевіч.
Нагадаем, што Аляксандр Казулін два гады знаходзіцца ў зняволенні. Палітыка асудзілі на 5,5 гадоў пазбаўлення свабоды за акцыі пратэсту супраць фальсіфікацыі вынікаў прэзідэнцкіх выбараў у сакавіку 2006 года. Вызвалення палітыка патрабуе ўвесь свет. Аляксандр Лукашэнка гэтымі днямі прызнаўся, што яму вядома пра хваробу Ірыны Козулінай, тым не менш палітвязня не вызвалілі.
Супакой, Божа, душу Ірыны Казулінай.
Напісаць каментар (197)
