50 тысяч подпісаў за свабоду сумлення
1
11:33, — Палітыка
Больш як 50 тысяч подпісаў за змяненне закона «Аб свабодзе сумлення і рэлігійных арганізацыях» сабралі актывісты пратэстанцкіх цэркваў і сябры аргкамітэта па стварэнні Беларускай хрысціянска-дэмакратычнай партыі.
Акцыю можна назваць унікальнай, бо такая колькасць подпісаў збіралася толькі падчас кампаній па выбарах прэзідэнта, паведамляе «Нямецкая хваля».
Сёння подпісы будуць перададзеныя ў Канстытуцыйны суд, далей – у парламент і беларускаму кіраўніку. «Мы будзем спрабаваць перадаць гэтыя подпісы асабіста. Да подпісаў будзе прыкладзены зварот, дзе мы будзем выкладаць, якія нормы мы хацелі б змяніць і чаму», – дзеліцца планамі юрыст царквы «Новае жыццё» Сяргей Луканін.
Прыняты ў 2002 годзе закон «Аб свабодзе сумлення і аб рэлігійных арганізацыях» рэзка і неканстытуцыйна звузіў прапаведніцкую дзейнасць у краіне.
«Нялёгкая задача сабраць 50 тысяч подпісаў у краіне, дзе няма свабоды сумлення. Якая замацаваная ў Канстытуцыі Рэспублікі Беларусь, але насамрэч, на жаль, за чытанне Бібліі з таварышамі, з сябрамі дому, можна атрымаць арышт на 10 сутак, і ўсё гэта па заканадаўстве», – гаворыць Георгій Вязаўскі, пастар суполкі баптыстаў «Запавет Хрыста».
Слуханні ў Еўрапарламенце
Арганізатары не ўтойваюць, што маюць намер прасіць дапамогі ў міжнароднай супольнасці. Копіі подпісаў будуць перададзеныя ў Еўрапарламент, бо, свабода сумлення, тлумачыць палітык Аляксей Шэін, не менш важная, чым іншыя свабоды.
«Адным з вынікаў нашай кампаніі, як я спадзяюся, павінна стаць тое, што заходнія грамадствы ўключаць забеспячэнне гэтага права як адзін з крытэраў ацэнкі дэмакратычнасці сітуацыі ў Беларусі ў цэлым. І уключаць яго ў перамоўны працэс, які ідзе цяпер паміж краінамі Захаду і беларускай уладай», – спадзяецца Аляксей Шэін.
Паводле яго слоў, арганізатары збору подпісаў будуць дамагацца правядзення спецыяльных слуханняў па рэлігійнай сітуацыі ў Беларусі.
Акультызм – іншае справа
Зрэшты, гаворачы пра свабоду, дэмакратыю і шырокі доступ місіянераў да парафіянаў, актывісты акцыі выступаюць за жорсткія абмежаванні для акультных практык. Ідэя ўвесці забарону на дзейнасць астролагаў, чараўнікоў і інш., на думку біскупа суполак хрысціян поўнага Евангелля Вячаслава Ганчарэнкі, гэта нармальная рэакцыя разважных людзей, прычым і вернікаў, і няверуючых.
«Трэба сёння цвяроза ацэньваць сітуацыі і біць у званы. Таму што ёсць сур'ёзныя хваробы, якія развіваюцца ў грамадстве ў выніку так званай паліткарэктнасці, калі грамадства ўсё праглынае», – мяркуе пастыр.
Традыцыйныя канфесіі абараняюцца
А вось праваслаўны святар Аляксандр Шрамко не бачыць сілаў у грамадстве, якія здольныя змяніць наяўныя рэлігійныя правілы. Справа ў тым, што так званыя традыцыйныя рэлігіі закон цалкам задавальняе.
«Праваслаўныя і каталікі тут саюзнікі. Яны атрымалі практычна аднолькавыя правы, магчымасць складаць пагадненні, усталёўваць нейкія адмысловыя стасункі з дзяржавай», – адзначае Шрамко.
Ён мяркуе, што прадстаўнікі традыцыйных рэлігій баяцца канкурэнцыі. Адной з прычын прыняцця закона стала тая акалічнасць, што колькасць суполак хрысціян поўнага Евангелля, так званых «пяцідзесятнікаў», перасягнула колькасць каталіцкіх суполак. Праўда, за 5 гадоў існавання закона, прызнае Аляксандр Шрамко, сітуацыя не змянілася.
Навіны
па тэме
