Анатоль Красуцкі: «Заяву Дзярждэпартамэнту разгледзяць»
2
15:31, — Палітыка
Дзярждэпартамэнт ЗША выступіў з заявай, у якой выказваюцца спадзяваньні на датэрміновы і канчатковы выхад на волю Аляксандра Казуліна. Намесьнік старшыні міжнароднай камісіі «палаты прадстаўнікоў» Анатоль Красуцкі выказаў упэўненасьць, што “заява Дзярждэпартамэнту ЗША будзе прынятая для разгляду кіраўніцтвам нашай краіны”.
«Я думаю, што заява Дзярждэпартамэнту ЗША будзе прынятая для разгляду кіраўніцтвам нашай краіны. Наколькі яе прымуць для ўвагі? Тут трэба ўлічваць усе канкрэтныя абставіны, зьвязаныя з гэтым пытаньнем. У сьвеце было шмат прэцэдэнтаў, якія нечым нагадвалі сытуацыю з Аляксандрам Казуліным. І калі гэта будзе адпавядаць нацыянальным інтарэсам Беларусі, дык цалкам магчыма прыняцьцё нейкага канструктыўнага рашэньня», - сказаў Красуцкі ў інтервію “Радыё Свабода”.
Нагадаем, прэсавы сакратар амэрыканскага дзярждэпартамэнту Том Кейсі сёньня заявіў, што “вельмі важна, каб вызваленьне Казуліна было канчатковым”. Калі ж палітвязьня вызваляць датэрмінова, то “ЗША будуць гатовыя пачаць дыялёг зь Беларусьсю адносна далейшых крокаў па паляпшэньні двухбаковага супрацоўніцтва”
А наконадні Аляксандар Лукашэнка падчас прызначэньня прадстаўнікоў Беларусі за мяжой заявіў: “Калі мы ідзем на нейкія кампрамісы з нашымі суседзямі, з амэрыканцамі, з Эўразьвязам па пэўных накірунках, гэта не азначае, што мы мяняем палітыку, яна ў нас вызначаная. У нас няма той сілы, перад якой мы можам сёньня дрыжаць, прыніжацца і прагінацца”, - падкрэсьліў Лукашэнка.
