Who is Андрэй Максімаў?

У той час, як старшыня Партыі БНФ Лявон Баршчэўскі пагражае падаць у суд на «Белорусскую военную газету», калі тая не апублікуе свайго абвяржэння артыкула «Дима Железниченко как зеркало несостоявшейся «васильковой революции», у рэдакцыі рыхтуюць адказ Баршчэўскаму і хаваюць сапраўднае імя аўтара матэрыяла.

«Радыё Рацыя» затэлефанавала галоўнаму рэдактару «Белорусской военной газеты» Уладзіміру Аляксандраву.

— Ці атрымалі вы ліст Баршчэўскага?

— Так, атрымаў.

— Як пракаментуеце?

— Усе каментары будуць пазней. І падрыхтуем адказ для спадара Баршчэўскага.

— Рэдакцыя дапускае магчымасць публікацыі ліста старшыні партыі БНФ?

— Без каментароў.

— Аднак, калі праз тыдзень вы не надрукуеце яго ліст, Баршчэўскі падасць зыск у суд.

— Без каментароў.

— Асабіста Вы згодныя хаця б з нечым, што напісана ў лісце лідэра партыі БНФ?

— Яшчэ раз паўтараю, мы падрыхтуем адказ. Там усё будзе сказана.

— Калі можна чакаць гэты адказ?

— У бліжэйшы час.

— Цягам тыдня?

— Так.

— Андрэй Максімаў — гэта псеўданім ці рэальны чалавек?

— Усё. Я заняты. Пазваніце пазней.

Больш рэдактар «Белорусской военной газеты» на званкі не адказваў. Аднак, як удалося даведацца, ніякага Андрэя Максімава ў рэдакцыі не існуе, хутчэй за ўсё, пры напісанні скандальнага артыкула быў скарыстаны псеўданім. Ва ўсялякім выпадку першы намеснік галоўнага рэдактара Уладзімір Рудэнка пра існаванне такога аўтара нічога не ведае.