У Баранавічах ледзь не ўзляцеў у паветра цэлы квартал
3
10:35, — Здарэнне
У Баранавічах менскія спецыялісты па халатнасці прабілі газавую трубу. Найменшая іскра на месцы аварыі магла прывесці да страшнага выбуху.
Газаправод на скрыжаванні вуліц Шаўчэнка і Вагоннай, які праходзіць пад зямлёй, апынуўся прабітым наскрозь пры пракладцы ліній электразабеспячэння. Гэтыя працы выконваліся спецыялістамі менскага НП ТАА "Энергожилпромстрой" і яго субпадрадчыка БМУ № 7 (будаўніча-мантажнае ўпраўленне) у рамках праекту па паляпшэнні электразабеспячэння жылога сектара, піша Bulletinonline
Калі зразумелі, што прабілі газавую трубу, адразу ж звярнуліся ў аварыйную службу МПУ "Баранавічыміжрайгаз". Як распавядаюць працоўныя міжрайгазу, калі яны прыбылі на месца здарэння, зямля пад іх нагамі літаральна дрыжала.
– Сітуацыя была крытычнай. На тэрыторыі амаль цэлага квартала адчувалася выбуханебяспечная сумесь паветра і газу. Адна выкінутая цыгарэта або нават іскра аўтобуса, які б праязджаў паблізу, – і трагедыі было б не пазбегнуць! Ад выбуху пацярпелі бы ўсе бліжэйшыя дамы, – распавёў электразваршчык Віктар Козел.
За той час, пакуль уцечка газу не была ліквідаваная, на паверхню выйшлі 23 тысячы кубаметраў паліва.
Мясцовыя жыхары, якія знаходзіліся ў сваіх дамах, хутка адчулі прыкры пах газу.
– Пра аварыю я даведалася амаль адразу. У двары стала моцна смярдзець газам, а неўзабаве прыкры пах запоўніў увесь дом. Бачыла, як людзі, якія ішлі па вуліцы, закрывалі насы, – распавяла жыхарка дому па вуліцы Шаўчэнка Наталля. – Калі я патэлефанавала па нумары 104, мне сказалі зачыніць усе дзверы, фортачкі і чамусьці сядзець дома. Але знаходзіцца ў будынку, прапахлым газам, з падгадаваным дзіцем было проста небяспечна! Я адправілася з сынам да свякрухі ў іншы раён.
Прыбыўшыя на месца ЧП супрацоўнікі "Баранавічыміжрайгаза" з дапамогай лапат прыступілі да раскопак трубы. Нягледзячы на сур'ёзную небяспеку, калі для выбуху хапіла б звычайнай запалкі, электразваршчыкам Віктару Козелу і Мікалаю Бяляцкаму ўсё-ткі атрымалася зварыць дзіры ў трубе.
Па словах дырэктара Баранавіцкіх электрычных сетак Дзмітрыя Гаўрылені, да ЧП прывяло адхіленне менскіх спецыялістаў ад зацверджанага праекту. Па-першае, падрадчыкам на месца прац не былі выкліканыя прадстаўнікі "Баранавічыміжрайгаза". Па-другое, працоўныя дапусцілі парушэнне пункта праекту, дзе была зацверджаная глыбіня праколу.
Галоўны ж інжынер НП ТАА "Энергожилпромстрой" Сяргей Міксюк, які ў тэлефоннай гутарцы быў лаканічны, на аварыю адрэагаваў дзіўна:
– Ніхто гэту трубу не чапаў. Яна сама ад старасці лопнула!
Шкода, нанесеная "Энергожилпромстроем" МПУ "Баранавічыміжрайгаз", склала не менш як 12 млн рублёў.
