На псіхсумоўі можа дапамагчы грамата БРСМ
8
15:56, — Грамадства
Ужо некалькі месяцаў увага беларускіх журналістаў прыкавана да неабходнага цяпер для паступлення на некаторыя універсітэцкія спецыяльнасці прафесійна-псіхалагічнага сумоўя.
Карэспандэнт «Радыё Рацыя» вырашыў праверыць, наколькі праўдзівыя чуткі аб неверагодных чэргах на сумоўе, і сам паспрабаваў запісацца на яго.
А другой гадзіне дня на першым паверсе галоўнага корпусу Беларускага дзяржаўнага універсітэту даволі шматлюдна – у кагосьці толькі што скончыліся заняткі, хтосьці, наадварот, спяшаецца на лекцыі. У холе стаяць і некалькі дзесяткаў чалавек зусім не падобных да студэнтаў – гэта сёлетнія выпускнікі разам са сваімі бацькамі чакаюць сваёй чаргі у кабінет прыёмнай камісіі. Менавіта тут маладзёнаў рэгіструюць на ўведзенае ад гэтага году прэзідэнтам Беларусі прафесійна-псіхалагічнае сумоўе.
Чарга рухаецца даволі марудна, абітурыенты, што здолелі самастойна спампаваць бланкі заявы на рэгістрацыю з інтэрнэту, па чарзе запаўняюць іх на імправізаваных сталах, прынесеных са сталовай кімсьці з папярэднікаў.
17-гадовы Антон, навучэнец 78-й сталічнай школы, памыляецца у напісанні неабходнага накірунку і цяпер вымушаны сумна чакаць сваёй чаргі у кабінет:
- Адмыслова сарваўся з заняткаў, каб зарэгістравацца на сумоўе. Заўжды марыў быць правазнаўцам, ад пятага класу збіраюся паступаць у БДУ на юрфак, а тут нечакана ўводзяць гэтае сумоўе. І ўжо страшна становіцца, што, нават маючы “дзевяткі” і “дзесяткі” па “Чалавеку і грамадстве” і гісторыі Беларусі, можна не трапіць на універсітэцкае месца, бо “не падыдзеш характарам”.
Аднагодка Антона Юля, каб зарэгістравацца на сумоўе, прыехала сёння з маці са Смаргоні. Дзяўчына спадзяецца працаваць на мытні, бо там шмат яе сяброў. Юля кажа, што абавязкова пройдзе гутарку з камісіяй. Яна лічыць, што самае галоўнае падчас сумоўя - паказаць сваю зацікаўленасць у атрыманні спецыяльнасці.
Юліна маці ж кажа, што сумоўе - гэта чарговая трата дзяржаўных грошай, без якой можна было б абысціся, проста ўсталяваўшы адпаведны прахадны бал на той ці іншы факультэт:
- Усе дзеці цяпер пішуць цэнтралізаванае тэставанне і паступаюць альбо не паступаюць у інстытуты паводле яго вынікаў. Не трэба прымушаць нас сюды ездзіць па некалькі разоў – няхай бы проста ацэньвалі вынікі тэстаў. Я не думаю, што людзі, якія напішуць тэставанні на адні дзесяткі, захочуць потым кідаць вучобу.
Праз две з паловай гадзіны нарэшце падыходзіць чарга журналіста “ Рацыі”. У кабінеце людзей таксама шмат. З усімі размаўляе адказная сакратарка прыёмнай камісіі Людміла Хухлындзіна. Каб зарэгістравацца на сумоўе, трэба прад’явіць пашпарт і запоўніць адпаведную заяву. Сакратарка раіць рэгістравацца адразу на некалькі спецыяльнасцяў і ўказваць па магчымасці як мага больш поўныя звесткі:
- Інфармацыя, напрыклад, пра вашу цяперашнюю працу, медаль у школе альбо ганаровую грамату БРСМ можа ў спрэчным выпадку істотна схіліць чальцоў камісіі на ваш бок.
