Нацыянальныя сцягі нагадваюць беларусам пра 25 сакавіка
1
8:53, — Палітыка
Каля паловы восьмага вечара 1 сакавіка на страсе трохпавярховага жылога дому па вуліцы Герцэна ў Віцебску быў заўважаны бел-чырвона-белы сцяг.
Як паведаміў БелаПАН віцебскі апазіцыянер Барыс Хамайда, да сцяга была прымацаваная занатоўка: «Пашана і павага палітычнаму дзеячу Беларускай Народнай Рэспублікі і выбітнаму навукоўцу Вацлаву Ластоўскаму. Слава героям БНР! Жыве Беларусь! Мірон».
26 лютага на страсе трохпавярховага жылога дому насупраць будынка Віцебскага раённага суду таксама быў вывешаны бел-чырвона-белы сцяг у гонар аднаго з стваральнікаў БНР і аўтара III Статутнай граматы рэспублікі Антона Луцкевіча. Сцяг, які з'явіўся 19 студзеня на лініі электраперадачы над аўтатрасай Віцебск–Полацк, паводле прымацаванай да яго занатоўцы, быў вывешаны ў гонар першага прэм'ер-міністра ўрада БНР Язэпа Варонкі.
На думку Б.Хамайды, вывешванне бел-чырвона-белых сцягоў, прысвечанае дзеячам БНР, будзе праходзіць у Віцебску да 25 сакавіка: у гэты дзень будзе адзначацца 90-годдзе абвяшчэння БНР
З 1995 года «Мірон» вывешвае ў Віцебску бел-чырвона-белыя сцягі ў цяжкадаступных, але зручных для агляду месцах. Міліцыя ўвесь час адсочвае з'яўленне сцягоў, аднак затрымаць таго, хто падпісваецца імем Мірон, дагэтуль не атрымалася.
Навіны
па тэме
