Андрэй Саннікаў: «У планах Крамля – паўзучае падначаленне Беларусі сваім інтарэсам»
6
10:59, — Палітыка
Пасля прэзідэнцкіх выбараў нейкіх перамен у стаўленні Крамля да Беларусі чакаць не прыходзіцца.
«Па ўсёй бачнасці, у планах Крамля – паўзучае падначаленне Беларусі сваім інтарэсам, уключэнне Беларусі ў сцэнары расейскай палітыкі, як унутранай, так і знешняй», – заявіў міжнародны каардынатар Хартыі’97, сябар аргкамітэта грамадзянскай кампаніі «Еўрапейская Беларусь» Андрэй Саннікаў.
«Ціхі і непрыметны ход выбараў у Расеі, адсутнасць якога б то ні было суперніцтва паміж кандыдатамі гавораць самі за сябе. Фактычна, нягледзячы на наяўнасць чатырох кандыдатаў, гэта былі безальтэрнатыўныя выбары, якія захавалі ўладу ў руках цяперашняй кіруючай групы. Хутчэй за ўсё, тыя паблажкі, якія былі дадзеныя Лукашэнку напярэдадні прэзідэнцкіх выбараў, будуць паступова ануляваныя і без выканання ўмоў Расеі эканамічныя ільготы цяперашняя ўлада атрымаць не зможа. Верагодней за ўсё, неўзабаве ўзнікне пытанне па цане на нафту, газ, аплаце крэдытаў, а таксама мытных пошлінах і квотах на беларускія тавары», – лічыць дыпламат.
Саннікаў упэўнены, што Расея будзе імкнуцца перашкодзіць як дэмакратычным працэсам унутры Беларусі, так і развіццю стасункаў Беларусі з Еўропай.
«Усё гэта чарговым разам падкрэслівае неабходнасць карэннага перагляду палітыкі Беларусі і больш актыўнага курсу на збліжэнне з Еўропай. Менавіта ў Еўропе існуюць зразумелыя і празрыстыя правілы стасункаў ва ўсіх галінах, найперш, у гандлёва-эканамічнай, якія прынятыя ўсімі дзяржавамі Еўрапейскага Звязу (а іх ужо 27), і якія дазваляюць паспяхова развівацца не толькі гэтым дзяржавам, але і тым краінам, якія паўнавартасна супрацоўнічаюць з Еўропай», – лічыць сябар аргкамітэта грамадзянскай кампаніі «Еўрапейская Беларусь».
Навіны
па тэме
