Былы палітвязень Артур Фінькевіч сустрэўся з Вацлавам Гавэлам (фота)
13:13, — Палітыка
Адзін зь лідэраў “Маладога Фронту”, былы палітвязень Артур Фінькевіч запрошаны на міжнародны фэстываль дакумэнтальных фільмаў “Адзін сьвет”, які праходзіць у Празе. 5 сакавіка адбылася сустрэча ўдзельнікаў фэстывалю з былым прэзідэнтам Чэхіі Вацлавам Гавэлам.
Тэма фэстываля ў гэтым годзе - “Дыктатуры ў фокусе”. На фэстываль і канфэрэнцыю, што праходзіць у межах фэстываля, запрошаны Вязьні Сумленьня з усіх куткоў сьвету, дзе дасюль існуе дыктатура. Фэст імкнецца нагадаць, што паняцьці волі, свабоды, правоў чалавека не зьяўляюцца звычайнымі для ўсіх людзей. У рамках фэсту будуць адзначацца таксама 60-я ўгодкі прыняцьця Ўсеагульнай дэклярацыі правоў чалавека.
На фэстывале, арганізатарам якога зьяўляецца дабрачыннае грамадзтва “Чалавек у бядзе”, будуць прадстаўленыя 138 дакумэнтальных фільмаў, прысьвечаныя праблеме сусьветных дыктатур, бяспраўя, галечы.
"За дзевяць гадоў фэст набыў ідэнтычнасьць, харызму і ўнутранае перакананьне. У яго ня толькі гледачы, а таксама сябры і прыхільнікі. Фэст таксама знаходзіць шырокі міжнародны водгук,"- аб гэтым сказаў на прэс-канфэрэнцыі заснавальнік фэсту Ігар Блажэвіч.
Фэстываль “Адзін Сьвет” праходзіць пад апякунствам Вацлава Гавэла, міністра культуры Вацлава Еглічкі і мэра сталічнага горада Прагі Паўла Бэма.
Навіны
па тэме
