Пагадненне аб адкрыцці офіса Еўракамісіі ў Менску падпішуць 7 сакавіка
1
14:00, — Палітыка
Пагадненне паміж урадам Рэспублікі Беларусь і Камісіяй Еўрапейскіх супольнасцяў аб заснаванні, прывілеях і імунітэтах прадстаўніцтва Еўракамісіі ў Беларусі будзе падпісанае 7 сакавіка ў Брусэлі.
Пра гэта паведаміў журналістам прэс-сакратар Міністэрства замежных спраў Беларусі Андрэй Папоў 6 сакавіка на брыфінгу.
Паводле яго слоў, пагадненне падпішуць намеснік міністра замежных спраў Валеры Варанецкі і камісар ЕЗ па знешніх сувязях і палітыцы добрасуседства Беніта Ферэра-Вальднер.
Інфармацыя пра тое, што пагадненне будзе падпісанае менавіта 7 сакавіка, з'явілася на мінулым тыдні. Пра гэта «Радыё Свабода» на правах ананімнасці паведаміў службовец Еўракамісіі, аднак беларускі МЗС тады адмовіўся пацвердзіць альбо абвергнуць гэтую інфармацыю.
Як нагадвае БелаПАН, яшчэ ў 2005 годзе Еўракамісія зрабіла запыт наконт магчымасці адкрыцця ў Менску прадстаўніцтва. Аднак толькі 19 кастрычніка 2007 года Аляксандр Лукашэнка сваім указам ухваліў праект пагаднення аб адкрыцці офіса ЕК. 5 снежня ў Менску праект пагаднення быў парафіраваны.
"Беларусь згаджаецца з адкрыццём на сваёй тэрыторыі прадстаўніцтва Камісіі Еўрапейскіх супольнасцяў", а таксама "прызнае на сваёй тэрыторыі за кожным з Еўрапейскіх супольнасцяў правасуб’ектнасць, у тым ліку права складаць кантракты, набываць маёмасць і распараджацца ёй у той меры, у якой гэта неабходна для ажыццяўлення імі сваіх функцый", гаворыцца ў пагадненні.
У дакуменце таксама адзначанае, што "Беларусь падае на ўмовах узаемнасці прадстаўніцтву, яго кіраўніку і сябрам, а таксама членам іх сем'яў, якія пражываюць разам з імі, права, прывілеі і імунітэты, прадугледжаныя Венскай канвенцыяй аб дыпламатычных стасунках ад 18 красавіка 1961 года для дыпламатычных прадстаўніцтваў (у прыватнасці, недатыкальнасць памяшканняў, допісу і архіваў, імунітэт ад крымінальнай юрысдыкцыі, падатковыя ільготы)".
