МЗС Беларусі мяняе парадак выдачы візаў
17:38, — Грамадства
У Беларусі зьменены парадак выдачы візаў замежнікам.
Як паведаміў дырэктар дэпартамэнту турызму Міністэрства спорту і турызму Беларусі Віктар Янкавенка 10 красавіка на паседжаньні круглага стала ў Менску, увайшла ў моц пастанова Міністэрства замежных справаў Беларусі ад 12 сакавіка №7 “Пра ўнясеньне зьменаў і дадаткаў у інструкцыю пра парадак выдачы візаў Беларусі замежным грамадзянам і асобам без грамадзянства”.
Згодна зь ягонымі словамі, паводле гэтай пастановы турыстычны ваўчар больш не зьяўляецца падставай для выдачы візаў у Беларусь. Замест ваўчара выкарыстоўваецца хадайніцтва пра ўезд у краіну і кароткатэрміновую візу бяз права працаваць па найме. В.Янкавенка адзначыў, што хадайніцтва – “найпростай формы” і афармляецца адно на турыстычную групу. У замежную ўстанову перадаецца арыгінал хадайніцтва альбо яго факсымільная копія, піша БелаПАН.
На думку В.Янкавенкі, новый парадак выдачы беларускіх візаў спрашчае працу беларускіх турапэратараў: “Зьнікла патрэба перадаваць ваўчар замежнаму партнэру, ня трэба вытрымліваць праверкі мытных ворганаў”. Але ён падкрэсьліў, што пастанова не адмяняе ваўчар як такі: гэты дакумэнт павінен захоўвацца ў Беларусі.
Адмысловец паведаміў, што ў сувязі са спрашчэньнем працэдуры выдачы беларускіх візаў туркампаніям варта асабліва ўважліва паставіцца да працы з турыстамі з краін “зоны падвышанай рызыкі”, да якіх можна аднесьці Індыю, Аўганістан, Ірак і шэраг іншых. Па яго словах, грамадзяне гэтых краінаў часам прыязджаюць у Беларусь, каб нелегальна пераправіцца ў краіны Эўрапэйскага Зьвязу. У такім выпадку дэпартацыя іх на радзіму ажыцьцяўляецца за кошт запрашаючай краіны, гэта значыць беларускіх турапэратараў. “Да гэтых краінаў трэба ставіцца вельмі сур’ёзна. Трэба, каб былі выкананы ўсе ўмовы: аплата гатэля за ўвесь час побыту, зваротны білет”, - заявіў В.Янкавенка.
