Мінсувязі жадае адмяніць манаполію "Белтэлекаму"
8
18:28, — Сувязь
Міністэрства сувязі і інфарматызацыі Беларусі скіравала ў "парламент" прапанову пра ўнясенне зменаў у закон аб электрасувязі, датычную дэманапалізацыі рынку паслуг электрасувязі.
Пра гэта паведаміў журналістам першы намеснік міністра сувязі і інфарматызацыі Беларусі Іван Рак.
"Мы чакаем унясення зменаў у закон аб электрасувязі для правядзення дэманапалізацыі рынку паслугаў электрасувязі. Прапановы ў красавіку былі занесены ў "парламент", разгледжаны і дасланы на дапрацоўку", - сказаў І.Рак.
Ён растлумачыў, што Мінсувязі прапануе ўнесці ў закон аб электрасувязі змены ў частцы адмены манаполіяў "Белтэлекаму" на ўзаемадзеянне з сеткамі аператараў іншых краінаў. Гэта ўмова з'яўляецца абавязковай для ўваходу Беларусі ў Сусветную гандлёвую арганізацыю, паведамляе "Інтэрфакс".
Адначасова І.Рак адзначыў, што гэты від дзейнасці "Белтэлекаму" з'яўляецца крыніцай скрыжаванага субсідавання: за кошт прыбытку ад гэтых паслуг Мінсувязі фінансуе стратныя паслугі. У тым ліку развіццё сувязі ў сельскай мясцовасці.
З нагоды чаго першы намміністра адзначыў, што тарыфы на аказанне паслугаў сувязі ў Беларусі да сабекошту пакуль не даведзены. "Той план рэбалансавання тарыфаў, што быў даведзены на 2006-2008 год, сёння не рэалізаваны, і да канца году рэалізаваць яго будзе немагчыма, паколькі ён прадугледжвае падвышэнне тарыфаў у 2-3 разы дзеля таго, каб давесці тарыфы да сабекошту", - патлумачыў І.Рак. Ён дадаў, што занесеныя ў парламент папраўкі да закону аб электрасувязі асобна адзначаюць гэты момант. "Мы разлічваем, што нашы папраўкі будуць прынятыя", - сказаў І.Рак.
Першы намміністра асобна адзначыў, што дэманапалізацыя рынку паслуг электрасувязі ніяк не звязана з магчымым акцыянаваннем "Белтэлекаму". "Акцыянаванне ці неакцыянаванне "Белтэлекаму" ніяк не звязана з гэтай працэдурай. Адзначу, аднак, што незалежна ад формы ўласнасці, "Белтэлекам" будзе працаваць, як і працаваў", - падкрэсліў І.Рак.
Прадстаўнік Мінсувязі адзначыў, што адмена манаполіі не адразу зменіць сітуацыю на рынку. "Мусіць прыйсці фундатар, які будзе ладзіць свае сеткі ці атрымае права на ўзаемадзеянне з іншымі аператарамі. Тады пачнецца канкурэнцыя на коштавым рынку, і тарыфы пачнуць зніжацца", - мяркуе І.Рак.
