Ангела Мэркель заклікала Еўропу падтрымаць барацьбу беларусаў за дэмакратыю
7
14:48, — Палітыка
Еўропа мусіць падтрымаць тых, хто змагаецца ў Беларусі за дэмакратыю і тых, хто знаходзіцца ў беларускіх турмах па палітычных матывах. Пра гэта заявіла федэральны канцлер Нямеччыны Ангела Мэркель, адказваючы на пытанні дэпутатаў Парламенцкай асамблеі Рады Еўропы ў канцы свайго выступу ў межах вясновай сесіі.
Як паведаміла БелаПАН кіраўнічка НГА "Офіс за дэмакратычную Беларусь" Вольга Стужынская, Мэркель падкрэсліла, што гаворыць як прадстаўнік сваёй партыі - Хрысціянска-дэмакратычнага звязу.
У адказе на пытанне, якім чынам Еўропа можа дапамагчы беларускім прыхільнікам дэмакратычных зменаў, канцлер ФРГ заявіла пра неабходнасць "распаўсюду інфармацыі пра тых, хто знаходзіцца ў беларускіх турмах па палітычных матывах, каб яны не думалі, што пра іх забыліся".
Мэркель выказала думку, што спробы вярнуць Беларусь у дэмакратычную супольнасць краінаў Еўропы "займеюць плён".
