Бабруйскія ўлады не супраць фашысцкай свастыкі?
13:00, — Грамадства
Фашысцкая свастыка і выява шыбеніцы з зоркай Давіда каля паловы году "ўпрыгожвае" адзін з аўтобусных прыпынкаў Бабруйску.
Зневажальныя графіці з’явіліся на металічнай сцяне яшчэ восенню мінулага году. Магчыма, бабруйчане ўжо ўспрымаюць гэта проста часткай васемнаццатага аўтобуснага маршруту. Ва ўсялякім разе, пасажыры, што чакаюць транспарту, услых свайго стаўлення не выказваюць, піша сайт Bulletinonline.
Да жалю, для Бабруйску падобнага кшталту вандалізм стаў будзённасцю.
Пытанне аб пазбаўленні камунальнай уласнасці ад рознага кшталту графіці ў пачатку красавіка абмяркоўвалася на планёрцы ў гарвыканкаме. Нават створаная спецыяльная брыгада "Белжылкамгасу" для зафарбоўвання розных несанкцыянаваных надпісаў.
Пікантнасць сітуацыі з прыпынкам у Кісялевічах у тым, што ён фактычна нічый. Як патлумачылі ў прыёмнай ГарДЭУ, калі на прыпынку грамадскага транспарту маецца гандлёвы павільён, адказваць за чысціню сценаў павінен яго ўладальнік. А калі кіёска там няма, дык на няма і суда няма. Прыпынак безгаспадарны.
Праўда, тэрыторыя самога прыпынку ўсё ж такі прыбіраецца дворнікамі ГарДЭУ, адзін з адміністратыўных будынкаў якога размешчаны побач.
Распавядае мясцовы педагог Ларыса Іванаўна:
– Гэтая мярзота красуецца тут даўно. Я некалі спрабавала звярнуць на яе ўвагу работніцы, якая мяце прыпынак. На што жанчына адказала, маўляў, яна за сцены на прыпынку не адказвае, а толькі за адсутнасць смецця. Я ўдакладніла: "А калі б тут было напісана: "Далоў Лукашэнку"? Узбурэнню жанчыны не было мяжы: "Не трэба ўблытваць мяне ў палітыку!"
