Лукашэнка пужае электарат коштамі
12
11:56, — Эканоміка
У Беларусі растуць кошты на харч. Аляксандр Лукашэнка, апярэджваючы абурэнне беларусаў, паведаміў, што на дасягнутай планцы кошты не спыняцца і неўзабаве дасягнуць еўрапейскага і расейскага ўзроўня.
"Кошты на прадукцыю будуць расці. У Расеі, Украіне, Беларусі, краінах Еўрасаюза яны будуць прыкладна аднолькавымі. Сёння яны ў нас крыху ніжэй. Мы стрымліваем кошты, але гэта няслушна і дае магчымасць вывазу прадукцыі... Мы залежым ад усіх працэсаў, што адбываюцца ў свеце", - сказаў Аляксандр Лукашэнка падчас працоўнай паездкі ў Гарадзенскую вобласць. Са словаў беларускага кіраўніка вынікала, што прычына падаражэння недзе па-за краінай, піша расейская " Независимая газета".
Інфляцыя ў першым квартале 2008 года склала 104,1%, што відавочна больш за чаканні ўраду краіны, паколькі гадавы прагноз росту спажывецкіх коштаў - 106-108%. Для яго захавання пры цяперашняй сітуацыі мусіць адбыцца зніжэнне коштаў, тады як перадумоваў для гэтага няма. Міністэрства сельскай гаспадаркі Беларусі рэгулярна ініцыюе падвышэнне закупных коштаў на сельгаспрадукцыю, матывуючы гэта стратнасцю сельгасвытворцы ва ўмовах падаражэння энергарэсурсаў, кормаў ды інш. У сваю чаргу, закупныя кошты, без сумневу, пацягнуць за сабой раздробныя.
Мясцовыя назіральнікі не схільны давяраць афіцыйнай статыстыцы, паколькі адсочванне кошту асобных прадуктаў дае іншыя вынікі. Менскае гарадское ўпраўленне статыстыкі апублікавала лічбы па росце коштаў у сталіцы. Па звестках ведамства, за год алей падаражэў на 85,2%, масла - на 30,2%, малако і малочныя прадукты - на 28,8%, макаронныя вырабы - на 26,6%, сыры - на 23,8%. Мяса і птушка сталі каштаваць даражэй на 17,2%, хлеб - на 12,4%, яйкі - на 12,1%.
І гэта пры тым, што дзяржава трымае кошты ў "яжовых рукавіцах": кожнае падвышэнне вытворца мусіць узгадняць з мясцовым выканаўчым органам. Прычым не проста ставіць у вядомасць, а давесці, што захаванне кошту на ранейшым узроўні выкліча пагаршэнне эканамічных паказнікаў кампаніі. Мясцовыя вытворцы скардзяцца, што дамагчыся дазволу падвысіць кошт атрымліваецца не заўсёды.
Урад тлумачыць рост коштаў на харч станам знешніх рынкаў. Аднак мясцовыя эксперты кажуць пра неэфектыўнасць беларускай сельгасвытворчасці, што, у сваю чаргу, з’яўляецца наступствам неабазнанай дзяржаўнай палітыкі.
Напрыклад, прыводзяцца звесткі пра тое, што для вытворчасці аднаго кілаграма мяса Беларусь выдаткоўвае ў 8-10 разоў болей электраэнергіі, чым у развітых краінах. "У нашай краіне на вытворчасць малака і ялавічыны ідзе корму на 3 мільёны тон болей, чым прадугледжана нарматывамі. Асноўная прычына - іх нізкая якасць з-за незахавання тэхналогіі нарыхтоўкі, а таксама невысокая забяспечанасць кормаў бялком і цукрам", - напісаў у сваім артыкуле цяпер ужо былы міністр сельскай гаспадаркі Беларусі Леанід Русак.
Дарэчы, адстаўка адбылася адразу пасля з'яўлення гэтага артыкула, што дало мясцовым журналістам нагоду наўпрост звязаць гэтыя дзве падзеі. Міністр прызнаў тое, пра што даўно пісалі незалежныя эксперты, - беларускі экспарт, якім так ганарыцца Лукашэнка, стратны. "На кожным кілаграме алею страта да 2 тысяч рублёў, не маем мы прыбытку і ад рэалізацыі на экспарт свініны, птушкі і яйкі", - распавёў міністр грамадскасці таямніцы сельскай гаспадаркі краіны.
Непераканаўча выглядаюць тлумачэнні ўраду і пры параўнанні тэмпаў інфляцыі ў еўрапейскіх краінах і Беларусі. Напрыклад, у суседняй Польшчы за год харч падаражэў толькі на 8%, у то час як у Беларусі - на 17%. Сітуацыя з коштамі, бясспрэчна, пагражае сацыяльнай стабільнасці краіны, што і вымушае Лукашэнку рабіць пагрозлівыя прагнозы, каб падрыхтаваць насельніцтва і назваць віноўцу, якім, вядома, будзе не ён.
Напісаць каментар (12)
