Рэдактар дзяржаўнай газеты абвінавачаны ў крадзяжы
1
14:39, — Крымінал
У Салігорску лічаць, што справу ў рэшце рэшт спусцяць на тармазах. Маўляў, свой свайго не здасць. Ва ўсялякім выпадку, галоўнага рэдактара газеты “Шахцёр” на час правядзення следства ад пасады не адхілілі.
Супраць галоўнага рэдактара салігорскай газеты "Шахцёр", чальца выканкама Вольгі Капцавіцкай узбуджаная крымінальная справа па артыкуле 210 ч.1 (раскраданне шляхам злоўжывання службовым становішчам). Аднак яна па-ранейшаму падпісвае выданне, піша Bulletinonline.
Справу расследуе аддзел па барацьбе з эканамічнымі злачынствамі Салігорскага РАУС. Вольга Капцавіцкая падазраецца ў незаконным засваеннем некалькіх мільёнаў рублёў з кішэні рэдакцыі.
Па горадзе ходзяць чуткі, што салігорская вертыкаль усяляк намагаецца, што завецца, выцягнуць з ямы кіраўніка свайго галоўнага рупара. Узгадваюць аб яе вельмі добрых адносінах са старшынёй райвыканкама, і проста аб тым, што свой свайго не здае.
Ва ўсялякім выпадку, Вольгу Капцавіцкую на час правядзення следства ад пасады не адхілілі. Верагодна, этычныя нормы вертыкаль вырашыла адкінуць у бок. Прадэманстраваўшы, што гэтыя самыя нормы, якія так старанна прапагандуе райвыканкамаўская газета, годныя толькі для швачак і трактарыстаў.
