Тэлерадыёкампанія Літвы: Прабачэнняў беларускага пасла недастаткова
3
15:58, — Палітыка
Кіраўніцтва Літоўскай нацыянальнай тэлерадыёкампаніі лічыць, што вусных прабачэнняў пасла Беларусі ў Літве недастаткова, каб вычарпаць інцыдэнт з затрыманнем здымачнай групы LRT.
Як паведаміла прэс-служе БАЖ журналістка тэлеканалу Рута Рыбачаўскене, сёння дырэктар LRT Аўдрус Сяўрусявічус паўторна накіраваў ліст на імя беларускага пасла ў Літве Уладзіміра Дражына з патрабаваннем вярнуць адабраную пры затрыманні відэакасету і кампенсаваць выдаткі на рамонт зламанай відэакамеры.
«Прабачэнні спадара пасла — гэта добра. Але нам усё ж патрэбна для працы касета са здымкамі пра падзеі 25 сакавіка на мірнай вулічнай дэманстрацыі», — зазначыла Р. Рыбачаўскене.
Журналісты літоўскага тэлебачання Рута Рыбачаўскене і Ёнас Грышконіс, якія маюць акрэдытацыю на працу ў Беларусі, былі затрыманыя на вулічнай акцыі ў Менску 25 сакавіка. У часе інцыдэнту журналістам пашкодзілі камеру. Пасля праверкі дакументаў у Цэнтральным РУУС у іх забралі касету з адзнятым на акцыі матэрыялам і адпусцілі.
