План лорда Бэла згубіўся?
10
15:19, — Палітыка
Ні ў адміністрацыі прэзідэнта, ні ў Міністэрстве замежных спраў Беларусі ніхто не бачыў плана лорда Бэла па паляпшэнні іміджу беларускай улады.
Раней англійскі піяршчык Цімаці Бэл, які на замову Лукашэнкі распрацаваў такі план, у інтэрв'ю «Еўрарадыё» паведаміў, што дакумент ужо накіраваны ў Менск і мусіць быць на стале ў Лукашэнкі.
Аднак Павел Лёгкі, прэсавы сакратар Лукашэнкі, кажа, што ніякіх планаў ад лорда Бэла не бачыў і параіў звярнуцца ў Міністэрства замежных спраў Беларусі:
“Я ад лорда Бэла планаў не атрымліваў. Справа ў тым, што я кіраўнік прэсавай службы, а таму вы звяртаецеся не па адрасе. У яго, напэўна, нейкія свае каналы прадстаўлення інфармацыі. Мяркую, вам варта звярнуцца ў МЗС”, - патлумачыў Павел Лёгкі.
Марыя Ваньшына, прэс-сакратар беларускага МЗС, паведаміла, што пакуль ня можа нічога сказаць па гэтым пытанні, бо ў прэсавай службе не ведаюць пра існаванне такога дакументу.
У прыёмнай кіраўніка МЗС Сяргея Мартынава паведамілі, што галоўны дыпламат знаходзіцца ў доўгатэрміновым камандаванні, а таму дакладна не бачыў плану англійскага піяршчыка. І параілі звярнуцца ў канцылярыю МЗС.
Але там высветлілася, што аніякіх лістоў за подпісам англійскага лорда Бэла да іх не прыходзіла.
Паколькі дакумент Бэла ў Беларусі ніхто не бачыў, а англійскі лорд сцвярджае, што ўжо накіраваў яго на адрас Лукашэнкі, то ёсць два тлумачэнні яго адсутнасці: альбо план па паляпшэнні іміджу беларускіх уладаў сапраўды патрапіў наўпрост да Лукашэнкі, альбо дыпламатычная пошта працуе дрэнна.
Напісаць каментар (10)
