Справу аб «жывым шчыце» перадаюць у суд
4- 19.05.2008, 16:32
Крымінальная справа ў адносінах супрацоўнікаў ДАІ, якія затрымлівалі пад Менскам п’янага кіроўцу пры дапамозе “жывога шчыта”, сёння перададзеная ў суд.
Пракуратура Менскай вобласці скончыла расследаванне крымінальнай справы ў адносінах супрацоўнікаў ДАІ Кастрычніцкага раёну Менска, якія затрымлівалі на трасе "Менск-Мікашэвічы" п’янага кіроўцу, паведамілі "Інтэрфаксу" ў пракуратуры.
"Расследаванне дадзенай крымінальнай справы завершанае. Сёння матэрыялы будуць перададзеныя ў суд Менскага раёну", - паведамілі ў пракуратуры.
Там таксама ўдакладнілі, што "абвінавачванне прад’яўленае двум супрацоўнікам ДАІ . У адносінах яшчэ двух крымінальная справа спыненая па прычыне адсутнасці ў іх дзеяннях зместу злачынства". "Пад час дасудовага расследавання было ўстаноўлена, што двое супрацоўнікаў ДАІ, у адносінах якіх спыненая крымінальная справа, прыбылі на месца здарэння, калі п’яны кіроўца ўжо быў спынены", - паведамілі ў пракуратуры.
У сваю чаргу адвакат 6-ці асобаў, якія праходзяць па дадзенай справе ў якасці пацярпелых, Вера Страмкоўская паведаміла, што "ўсе 6 чалавек падалі грамадзянскі іск у адносінах супрацоўнікаў ДАІ на суму 50 млн рублёў кожны ў якасці кампенсацыі маральнай шкоды". Акрамя гэтага, па словах адваката, "пацярпелыя прад’явілі іск супрацоўнікам ДАІ ў памеры 25 млн рублёў за матэрыяльную шкоду".
Як раней паведамлялася, 14 сакавіка 2008 года пракуратура ўзбудзіла крымінальную справу ў адносінах 4 супрацоўнікаў аддзелу ДАІ Кастрычніцкага РУУС Менска, якія прымалі ўдзел у затрыманні п’янага кіроўцы Рамана Менцюка на трасе "Менск-Мікашэвічы" 2 сакавіка. Крымінальная справа была ўзбуджаная па ч. 1 арт. 424 "Злоўжыванне ўладаю ці службовымі паўнамоцтвамі" Крымінальнага кодэксу Беларусі.
Р.Менцюк ехаў з хуткасцю 160 км/г, супрацоўнікі ДАІ пачалі праследаванне. Супрацоўнікі ДАІ Кастрычніцкага раёну Менска з некалькіх машынаў, у якіх знаходзіліся людзі, выставілі загароду.
У адносінах Р.Менцюка таксама ўзбуджаная крымінальная справа за кіраванне транспартным сродкам у нецвярозым стане. Ён абвешчаны ў вышук.
