На думку міліцыі, «фашысцкая свастыка не з'яўляецца парушэннем грамадскага парадку»

У штаб-кватэру БНФ прыйшла пастанова аб адмове распачаць крымінальную справу "па фактах пашкоджання шкла і нанясення надпісаў на дзверы офіса".

Міліцыя палічыла, што гэтыя дзеянні (уключаючы малюнак фашысцкай свастыкі) не з'яўляліся "грубым парушэннем грамадскага парадку".

Нагадаем, што ўначы 30 сакавіка невядомыя разбілі вокны ў штаб-кватэры БНФ, напісалі на дзвярах офіса "Минск русский город" і намалявалі фашысцкую свастыку. У дадатак, на месцы здарэння былі знойдзены ўлёткі незарэгістраванай Нацыянал-бальшавіцкай партыі.

Высветлілася, што курсант акадэміі МУС Круглік, які шпацыраваў па начным Менску з жонкай, бачыў, як трое хлопцаў знаходзіліся каля штаб-кватэры БНФ, і адзін з іх "наносіў фарбай надпісы на дзверы". Мала таго, курсант пачуў гук сігналізацыі. Круглік затэлефанаваў па тэлефоне 102 і паведаміў пра здарэнне. Тым часам зламыснікі, зрабіўшы сваю чорную справу, спакойна вырушылі дадому: адзін з іх пайшоў у метро, а двое іншых з'ехалі ў трамваі маршруту №3 у бок Серабранкі, піша газета "Салідарнасць".

Па выніках разгляду Савецкі РУУС вырашыў адмовіць у распачынанні крымінальнай справы і даслаў у штаб-кватэру БНФ пасланне наступнага зместу (арфаграфія і пунктуацыя арыгіналу захаваныя): “Принятыми в ходе проверки мерами розыска, установить лицо, нанесшее надписи, а также повредившее стекло, не представилось возможным… В действиях не установленных лиц отсутствует состав преступления предусмотренного ст. 339 УК Республики Беларусь, так как в ходе проведения проверки не были полученные данные о том, что они были направлены на грубое нарушение общественного порядка и такого за собой не повлекли”.

Ну, зразумела! Згодна з кваліфікацыяй цяперашніх уладаў, "грубае парушэнне грамадскага парадку" - гэта калі нехта напіша на сцяне дома "Люблю Беларусь!". А свастыку малюйце, колькі заўгодна!