Упраўленне ДАІ МУС: «Аналагічная сістэма «перасячэнняў» дзейнічае ў Нямеччыне з 30-х гадоў»
24
8:30, — Аўто
Кіраўніцтва Дзяржаўтаінспекцыі патлумачыла, чаму збіраецца ўводзіць у Беларусі бальную сістэму ўліку парушэнняў правілаў дарожнага руху.
Увядзенне бальнай сістэмы ўліку парушэнняў правілаў дарожнага руху, якую рыхтуе міжведамная камісія, скіравана перадусім супраць злосных парушальнікаў. Па адзнаках ДАІ, яны складаюць 10-13 адсоткаў ад агульнага ліку кіроўцаў. Пра гэта на прэс-канферэнцыі 7 траўня заявіў начальнік аддзела навукова-метадычнага і прававога забеспячэння Упраўлення ДАІ МУС Анатоль Сушко.
Па ягоных словах, у склад міжведамнай камісіі ўваходзяць прадстаўнікі Вярхоўнага суду, Генеральнай пракуратуры, Нацыянальнага цэнтра законапраектнай дзейнасці пры прэзідэнце, Савета бяспекі і Міністэрства ўнутраных спраў.
А.Сушко не змог адказаць на пытанне, калі можа быць уведзена бальная сістэма. Па ягоных словах, цяпер вызначаецца, якім чынам гэта будзе зроблена - занясеннем зменаў у дзейны Кодэкc аб адміністрацыйных правапарушэннях ці прыняццем асобнага заканадаўчага акту.
А.Сушко нагадаў, што падобная сістэма – перасячэнняў - існавала ў савецкія часы. Аналагічная сістэма дзейнічае ў Нямеччыне з 30-х гадоў, яна добра паказала сябе ў Францыі і працуе ў большасці краінаў Еўропы, адзначыў начальнік аддзела.
На гэты момант законапраект, якім прадугледжваецца адмена крымінальнай адказнасці за паўторнае кіраванне транспартным сродкам на працягу года ў стане алкагольнага ап'янення і ўвядзенне канфіскацыі аўтамабіляў за гэтае правапарушэнне, знаходзіцца "у працоўным стане". Пра гэта паведаміў Анатоль Сушко.
Па ягоных словах, прапрацоўваецца тэхналогія канфіскацыі транспартных сродкаў. Падрыхтоўкай праекту займаецца спецыяльная працоўная група.
Як адзначыў А.Сушко, падобная практыка існавала ў савецкія часы, калі транспартныя сродкі канфіскоўвалі ў кіроўцаў згодна з рашэннем суду. Цяпер у Літве і Арменіі гэта робіцца з рашэння начальніка ДАІ. У Беларусі, хутчэй за ўсё, аўтатранспарт будзе канфіскоўвацца ва ўладальнікаў з рашэння суду, паведаміў А.Сушко.
Напісаць каментар (24)
