«Кастрычніцкую» зачынілі на нявызначаны тэрмін?
15
16:23, — Грамадства
Днямі стала вядома, што ўкраінскія метрабудаўнікі адмовіліся дапамагаць беларусам у рамонце станцыі “Кастрычніцкая” з прычыны нерэальнасці тэрміну выканання працы. У беларускіх спецыялістаў досведу па дэмантажы эскалатараў няма.
Станцыя метро “Кастрычніцкая” цалкам зачынілася для пасажыраў 9 чэрвеня. Цяпер пад зямлёй дэмантуюцца тры старыя эскалатары і ўсталёўваецца новы, вытворчасці “Крукаўскага вагонабудаўнічага завода” (Украіна). Скончыць рамонт планавалася да 1 верасня. Але спецыялісты з Украіны такі тэрмін лічаць нерэальным. Таму, па іх словах, і адмовіліся дапамагаць, паведамляе “Еўрарадыё”.
“Нас запрашалі, але ў нас з’явіліся іншыя замовы. Мы папярэджвалі — калі б гэтыя тэрміны былі ўзгодненыя раней, можна было б і пачынаць раней... А так, нават сёння няма ніякай канкрэтыкі, усё толькі вырашаецца, а тэрмін застаецца ранейшым – 1 верасня. Тыя тэрміны, якія заклалі (3 месяцы), яны проста нерэальныя”, - кажа прадстаўнік Крукаўскага вагонабудаўнічага заводу.
Па падліках кіеўскага метрапалітэна, рэканструкцыя, як мінімум, павінна працягнуцца да лістапада. “Кіеўскі метрапалітэн падлічваў аб’ём работ і даваў свае рэкамендацыі. Пры ўсім аб’ёме гэта выходзіла 4,5-5 месяцаў”.
Прадстаўнік Крукаўскага вагонабудаўнічага завода патлумачыў спецыфіку працы і расказаў, чаму ўкласціся да 1 верасня нерэальна. “ Трэба дэмантаваць усе эскалатары. Спачатку трэба падрыхтаваць для гэтага плошчы, толькі потым рабіць дэмантаж старых эскалатараў. Пасля будзе цалкам прыбірацца стары падмурак, закладацца новы падмурак. А падмурку, як вы разумееце трэба выстаяцца – застыць, прыняць свае формы... Гэта таксама час...”
Эскалатары старыя трэба не проста паламаць і выкінуць на смецце. Іх трэба ахайна дэмантаваць, усё гэта раскласці і вывезці, каб далей іх можна было дзесьці выкарыстоўваць, - кажа спецыяліст.
Рэканструкцыяй станцыі “Кастрычніцкая” займаецца УП “Менскметрабуд”. Досведу па дэмантажы эскалатараў арганізацыя не мае. Беларускіх будаўнікоў, вядома, не па сваёй волі паставілі ў такія ўмовы. Таму іх нежаданне каментаваць тэрміны зразумелае. Кажуць, што на такі аб’ём прац патрэбны год, а не тры месяцы.
“Я б не хацеў выносіць гэтае пытаньне на абмеркаванне грамадскасці. Не трэба нічога каментаваць. Напішыце лепш пра пасяўную ці пра ўборачную. Усе хочуць чужымі рукамі за тыдзень зрабіць працу, якую трэба выконваць год...”, - заявіў прадстаўнік “Менскметрабуду”.
Напісаць каментар (15)
Экспарт
