Лукашэнка: У «парламенце» трэба пісаць законы, а не пальцам указваць

Беларускі кіраўнік лічыць, што ў «парламент» трэба абіраць "працаздольных людзей, якія дзесьці аралі, будавалі, вучылі. Калі жа вы ўбачыце людзей, якія ў сваім жыцці нават не забілі кала, то абыходзьце іх бокам", - заявіў А.Лукашэнка.

"Адзінае, што я вам параю - вы паслухайце сваіх будучых «кандыдатаў» і не верце "крыкунам". Калі вам будуць абяцаць "залатыя горы", то вы іх пастаўце на зямлю і пастаўце перад імі пэўныя пытанні: Дзе? Як? І за якія грошы?", - сказаў беларускі кіраўнік, размаўляючы са студэнтамі менскіх вну пасля цырымоніі пачатку будаўніцтва Менскай студэнцкай вёскі.

Па словах А.Лукашэнкі, «парламент» - гэта вышэйшы заканадаўчы орган улады, туды трэба прыйсці і пісаць законы. А пальцам указваць не трэба. У нас для гэтага хапае людзей», - падкрэсліў А.Лукашэнка, мабыць, маючы на ўвазе сябе.

У Беларусі будзе свой Цэнтр кіравання палётамі, - агучыў свае касмічныя планы беларускі кіраўнік.

"Нам не трэба быць нейкай суперкасмічнай дзяржавай, але мы працягнем сваю касмічную праграму, таму што ў нас з'явілася добрая школа", - перакананы Лукашэнка. Пры гэтым ён паведаміў аб працягу рэалізацыі планаў па стварэнні ўласнага спадарожніка зандавання Зямлі. "Гэты спадарожнік будзе яшчэ лепш, чым той, які Расея загубіла пры запуску (заўв. – маецца на ўвазе БелКА)".

Ён таксама заявіў, што ў бліжэйшыя 5-7 гадоў Беларусь будзе атрымліваць 30% энергіі з альтэрнатыўных крыніц.

"Пастаўленая задача ў бліжэйшыя 5-7 гадоў атрымліваць 30% энергіі ад агульнага неабходнага аб'ёму з альтэрнатыўных крыніц. Мы шмат які гаворым аб незалежнасці і суверэнітэце. Але калі мы будзем і далей спатыкацца на гэтых энергарэсурсах, стаяць на каленях, вы ведаеце перад кім, то вось і ўся сутнасць ў незалежнасці і суверэнітэце", - сказаў Лукашэнка.

Не абыйшоў беларускі кіраўнік і тэму паніжэння падатковай нагрузкі ў краіне.

"Падатковая сістэма ў нас, можа быць, не грувасткая. Можа быць, відаў падаткаў у нас замала, можа, у нас метадалогія вылічэння іх цяжкаватая. Мы паглядзім, і будзем удасканальваць гэтую сістэму, але не ўсё так проста. А тое, што некаторым бізнэсмэнам не падабаецца наша падатковая сістэма, так яны наогул не жадалі бы плаціць гэтыя падаткі", - заявіў Лукашэнка.

Закрануў у сваім спічы Лукашэнка прадстаячую рэформу адукацыі.

Ён паабяцаў не толькі не скарачаць месцы ў вну, але ў сувязі з падвойным выпускам у наступным годзе нават павялічыць колькасць месцаў. "Мы адкрыем на гэты перыяд больш бюджэтных месцаў, папросім недзяржаўныя вну павялічыць колькасць месцаў для студэнтаў. Адукацыя робіць чалавека вольным і незалежным ", - сказаў А.Лукашэнка.

Аднак, як аказваецца, узровень адукацыі не моцна турбуе беларускага кіраўніка, уся справа ў грошах, якіх у бюджэце катастрафічна не хапае і прыходзіцца рабіць выбар – якасная адукацыя або зарплата настаўнікам. «12-годка дадаткова кожны год патрабавала б каля Br 150 млрд. Лепш мы аддадзім гэтыя грошы на стыпендыі і на заробкі настаўнікам. Але гэта не галоўнае, а галоўнае складаецца ў тым, каб разгрузіць вучэбныя праграмы».

У завяршэнні ж А.Лукашэнка растлумачыў, навошта рэформа была патрэбная і параіў студэнтам не з'яжджаць за мяжу.

"На працягу гэтай пяцігодкі мы паставім сярэднюю школу на правільныя рэйкі". Атрымоўваецца, дагэтуль, у тым ліку і ў тыя 14 гадоў кіравання Лукашэнкаі, беларуская школа развівалася «няправільна».

"Напрамілы бог, калі б у мяне была магчымасць, то я сабраў бы вас усіх, адправіў у Еўразвяз і потым паглядзеў, як бы вы вярнуліся дахаты праз месяц. Не шукайце шчасця за морам", - заявіў А.Лукашэнка, дадаўшы, што не любіць п'яніцаў, таму ў студэнцкай вёсцы пабудуе "вялікі спартовы комплекс".