Дакладчык ПАРЕ заклікае ўлады Беларусі не прымаць новы закон аб СМІ
15:42, — Палітыка
Дакладчык Парламенцкай Асамблеі Рады Еўропы па Беларусі Андрэа Рыгоні звярнуўся да беларускіх уладаў з просьбай прыпыніць разгляд закона аб СМІ.
«Праект закона аб сродках масавай інфармацыі выклікае ў мяне сур'ёзныя турботы. Я заклікаю беларускія ўлады прыпыніць наступны разгляд гэтага законапраекта і ўвядзенне яго ў дзеянне», - цытуе заяву Рыгоні РИА "Новости".
"Уступіўшы ў сілу, праект закона аб сродках масавай інфармацыі яшчэ больш абмяжуе свабоду інфармацыі ў Беларусі - асабліва ў адносінах электронных СМІ, а таксама пашырыць магчымасці органаў улады ўмешвацца ў дзейнасць сродкаў масавай інфармацыі, што ідзе насуперак з еўрапейскімі стандартамі. Больш таго, яшчэ да ўступа ў сілу новы законапраект будзе мець негатыўнае ўздзеянне ў выглядзе самацэнзуры сродкаў масавай інфармацыі. З улікам будучых «парламенцкіх» выбараў, гэта тым больш з'яўляецца прычынай клопатаў", - лічыць прадстаўнік ПАРЕ.
"Я заклікаю беларускія ўлады прыпыніць наступны разгляд гэтага праекту і ўвядзенне яго ў дзеянне. Перш чым працягнуць гэта працэс, варта правесці шырокія і канструктыўныя кансультацыі з беларускімі праваабарончымі арганізацыямі і грамадзянскім грамадствам, уключаючы, зразумела, прадстаўнікоў незалежных сродкаў масавай інфармацыі, а таксама адпаведныя міжнародныя арганізацыі, такія як Рада Еўропы. Гэта будзе для беларускіх уладаў выдатнай магчымасцю даказаць шчырасць імкнення зблізіцца з Еўропай", - заявіў Рыгоні.
Нагадаем, законапраект аб СМІ быў прыняты беларускім «парламентам» у рэкордна кароткія тэрміны. 17 чэрвеня ніжняя «палата» прыняла яго ў першым чытанні, 24 чэрвеня — у другім; 28 чэрвеня законапраект быў ухвалены верхняй «палатай». Зараз дакумент павінен падпісаць Лукашэнка. Новы закон уступіць у сілу праз шэсць месяцаў пасля афіцыйнага апублікавання.
У выпадку прыняцця гэтага дакумента ў цяперашняй рэдакцыі па незалежных сродках масавай інфармацыі будзе нанесены непапраўны ўдар, лічаць у Беларускай асацыяцыі журналістаў (БАЖ).
Найбольшыя турбота ў незалежнай журналісцкай супольнасці выклікае той факт, што ўлады змогуць блакаваць усе інтэрнэт-СМІ, не зарэгістраваныя ў Беларусі ў якасці сродку масавай інфармацыі.
Паводле праекту закона аб СМІ, пералік парушэнняў, за якія можна вынесці папярэджанне ў адрас рэдакцый, размыты і неабмежаваны, а прыпыніць выданне друкаванага СМІ можна нават за адно папярэджанне. Пры гэтым выносіць папярэджанні зможа суддзя, пракурор або чыноўнік любога райцэнтра.
