У Маскве сканала Нонна Мардзюкова
2
8:41, — У свеце
Учора ўвечары у адной з маскоўскіх лякарняў на 83 годзе жыцця сканала вядомая расейская акторка Нонна Мардзюкова.
Аб гэтым паведамляе "Газета.ру" са спасылкай на агенцтва ІТАР-ТАСС, якому аб смерці Мардзюковай распавяла сястра акторкі Наталля.
Аб прычыне смерці нічога не паведамляецца, аднак вядома, што акторка пакутавала на некалькі захворванняў, у тым ліку на дыябет, і ў апошнія гады часта апынялася ў лякарні. Апошні раз, па непацверджаных дадзеных, яна была шпіталяваная ў ЦКЛ у сакавіку 2008 года.
Як распавяла агенцтву Наталля Мардзюкова, за некалькі гадзінаў да смерці яна гутарыла з сястрой, якая "сказала, што адчувае сябе добра".
Нонна Мардзюкова дэбютавала ў кіно ў 1947 годзе падчас вучобы ва ВДІКу. Найбольш вядомыя ролі яна выканала ў такіх фільмах, як "Маладая гвардзія", "Брыльянтавая рука", "Мама", "Вакзал для дваіх" і "Жаніцьба Бальзамінова". За сваю працу ў кіно Мардзюкова атрымала некалькі дзяржаўных прэмій, а таксама атрымала званне народнай артысткі СССР.
