На сілавыя пасады падбіраюцца не ўраджэнцы Беларусі
37
10:24, — Палітыка
На ўсе ключавыя сілавыя пасады падбіраюцца пераважна людзі, якія нарадзіліся не ў Беларусі. Так, новым кіраўніком менскага АМАПу стаў асецін.
На днях менскаму АМАПу быў прадстаўлены новы кіраўнік — Юры Хаджымуратавіч Караеў. Былы кіраўнік АМАПа палкоўнік Юры Падабед цяпер ляжыць у шпіталі МУС. Паводле розных вэрсій, пасьля адстаўкі Падабеду прапанавалі працу ў ГУУС, але ён адмовіўся, бо не хацеў працаваць намесьнікам Аляксандра Найдзенкі. Такім чынам, Падабед сышоў на пэнсію ва ўзросьце 46 гадоў.
У 2004 годзе за жорсткі разгон мірных дэманстрацый і зьбіцьцё людзей Юры Падабед быў адным зь першых, каго ўнесьлі ў сьпіс невыязных у краіны Эўрасаюзу і ЗША.
Новы кіраўнік АМАПу па нацыянальнасьці не беларус, ён асецін. Юр’ю Караеву 42 гады. Да нядаўняга часу ён быў камандзірам міліцэйскай брыгады ў Гомелі, камандаваў міліцэйскім батальёнам у Бабруйску, быў камбатам у вайсковай частцы 32-14 Дзьмітрыя Паўлічэнкі. У 1996 годзе Караеў скончыў Акадэмію генштабу імені Фрунзэ.
Такім чынам, адзначае “Наша Ніва”, яшчэ адной сілавой структурай стаў кіраваць не ўраджэнец Беларусі. Варта толькі нагадаць, што Раду бясьпекі ўзначальвае ўраджэнец Днепрапятроўску Юры Жадобін, КДБ – яшчэ адзін сын афіцэра Савецкай арміі ўраджэнец Украіны Вадзім Зайцаў. На Смаленшчыне нарадзіўся міністар унутраных справаў Уладзімер Навумаў. Службай аховы прэзыдэнта кіруе пензенец Андрэй Уцюрын, а асабістую ахову Лукашэнкі ўзначальвае ўраджэнец расійскага Кургану. Дарэчы, і на пасадзе старшыні Цэнтравыбаркаму стаіць дачка савецкага афіцэра.
Недавер да этнічных беларусаў прыводзіць да таго, што на ўсе ключавыя сілавыя пасады падбіраюцца пераважна людзі, якія нарадзіліся не ў Беларусі і ўзгадоўваліся як асобы не ў Беларусі. Усіх гэтых людзей яднае траўма ад развалу СССР. Гэткі расклад падтрымліваецца з году ў год. Такога няма ні ў адной іншай эўрапейскай краіне.
Напісаць каментар (37)
Навіны
па тэме
