Зараз па справе аб выбуху шукаюць цэлую сям'ю

У межах расследавання крымінальнай справы аб выбуху ў Менску 4 ліпеня міліцыя шукае сям'ю, якая была на месцы знаходжання абясшкоджанай выбухной прылады з 21.00 да 23.00 3 ліпеня.

Гэтыя людзі знаходзіліся на тэрыторыі па дыяганалі ад канцэртнай пляцоўкі, якая размясцілася пад стэлай "Менск - горад-герой", паведамляе БелаПАН.

У інфармацыі, распаўсюджанай 5 жніўня ГУУС Менгарвыканкама, адзначаецца, што адмысловую цікавасць уяўляюць відэаматэрыялы, якія маюцца ў маладой сям'і: мужчыны і жанчыны ва ўзросце 23-25 гадоў. З імі быў хлопчык гадоў чатырох-пяці. Мужчына: рост прыкладна 178 см, сярэдняга целаскладу, волас цёмны, але не каротка стрыжаны, быў апрануты ў светлую тэніску і цёмныя штаны. Жанчына: рост прыкладна 170-175 см, хударлявая, волас прамой ніжэй плечаў, цёмна-карычневага колеру, рысы твару правільныя, была апранутая ў цёмную вопратку. Хлопчык: меркавана быў апрануты ў джынсавы строй, джынсавую кепку з казырком. Дзіцё актыўна танчыла, а дарослыя здымалі яго на відэакамеру або лічбавы фотаапарат.

Праваахоўныя органы пераканаўча просяць адклікацца дадзеную сям'ю і любым зручным спосабам падаць відэаматэрыялы альбо жа паведаміць аб сабе па тэлефонах: 102; 227-02-21; 227-21-24; 8-029-356-02-02 (Velcom); 8-029-632-02-09 (Velcom); 8-029-851-67-60 (МТС). Пры жаданні застацца інкогніта для следства дадзеная сям'я можа пакінуць любое (нават ананімнае) паведамленне на інтэрнэт-сайтах ГУУС Мінгарвыканкама або Міністэрства ўнутраных спраў. Таксама супрацоўнікі органаў унутраных спраў гатовыя выехаць па паказаным імі адрасе.

Як заявілі ў ГУУС, у межах расследавання праведзеныя дзясяткі экспертыз па слядах, выключаных з месца здарэння, а таксама складовых частак (прадметаў), выкарыстаных пры вырабе абясшкоджанай самаробнай выбухной прылады. Самую актыўную дапамогу ў гэтым аказваюць замежныя спецыялісты. У цяперашні час у расследаванні злачынства задзейнічаныя практычна ўсе праваахоўныя ведамствы. Праца вядзецца на тэрыторыі ўсёй краіны.