Ці пойдуць партыі на байкот выбараў, калі ўлада і надалей будзе парушаць іх правы?
2
16:43, — Палітыка
Большасьць апазіцыйных палітыкаў кажа, што здыме кандыдатуры сваіх кандыдатаў з “выбараў”.
На пытанне “Народнай волі” адказвалі самі палітыкі.
Сяргей КАЛЯКIН, 1-ы сакратар ЦК Партыi камунiстаў Беларускай:
— Апазiцыя выканае ўсё, што выкладзена ў нашай афiцыйна агучанай пазiцыi. А загадзя даваць адказ на тое, што будзе на фінішы выбараў, я не буду.
Лявон БАРШЧЭЎСКI, старшыня Партыi БНФ:
— Я думаю, што безумоўна. Ёсць тыя кропкi, ёсць той час, калi для гэтага набярэцца дастаткова фактаў i аргументаў. Пераканаўчых не толькi для нас самiх, але i для людзей. Бо, па вялiкім рахунку, у значнай часткі электарату пакуль няма настрою байкатаваць выбары. Таму для шырокамаштабнага байкоту трэба набраць вельмi моцныя аргументы. Яе усё будзе — канчаткова пакажа час.
Аляксандр ДАБРАВОЛЬСКI, член Палiтсавета Аб'яднанай грамадзянскай партыi:
— Можа, і пойдзе апазіцыя на байкот, калi будзе абсалютна вiдавочна, што ўлады наогул не пакiдаюць нiякай магчымасцi для работы з людзьмi. Iншая справа, што гэта павiнна быць усеагульнае рашэнне, якое павiнна прымацца кiраўнiцтвам Аб'яднаных дэмакратычных сiл. Таму такое рашэнне трэба абмяркоўваць i прымаць разам.
Сяргей СКРАБЕЦ, намеснiк старшынi Беларускай сацыял-дэмакратычнай Грамады:
— Па-першае, на мой погляд, правы як парушалiся, так i будуць парушацца далей. I чым далей у лес, тым больш будзе наламана дроў. Па-другое, пачатак збору подпiсаў паказаў, што многія людзi проста не хочуць удзельнічаць у «выбарах». Яны не вераць нiкому, не задаволены павышэннем цэн, адносiнамi чыноўнiкаў, карупцыяй… Поўная апатыя! Кажуць, што на выбары iсцi не мае сэнсу, бо праўды ўсё роўна не даб'ешся. А што датычыцца апазiцыi… Натуральна, пэўны сэнс у байкатаваннi выбараў ёсць. I, на мой погляд, большая частка апазiцыйных кандыдатаў усё ж такi здымецца, паколькі выбары ўсё больш і больш ператвараюцца ў фарс.
Андрэй КЛIМАЎ, дэпутат Вярхоўнага Савета Беларусi 13-га склiкання:
— Я думаю, што сёння апазiцыя дзейнiчае ў адпаведнасці са стратэгiяй, якая выпрацавана Еўрасаюзам у адносiнах да працэсу дэмакратызацыi Беларусi. Калi на гэтым этапе Еўрасаюз палiчыць бесперспектыўным удзел у «парламенцкiх выбарах», то апазiцыя, напэўна, так i паступiць. Але калi Еўрасаюз даб'ецца, каб на выбарах былi створаны прыстойныя ўмовы (хоць часу, на мой погляд, на гэта ўжо не засталося), то апазiцыi трэба будзе ўключацца ў агульную стратэгiю. Ад гэтага асноўнага фактару i будзе залежаць удзел апазiцыi ў «выбарах». Хоць мне, як дэпутату Вярхоўнага Савета 13-га склiкання, вiдавочна, што сёння «парламент» нiякiм чынам не ўплывае на палiтычную сiтуацыю ў краiне, паколькi практычна выключаны з працэсу норматворчасцi. Гэта ўсё ў руках выканаўчай улады. Таму, нават калi ў «парламенце» i будзе апазiцыя, яна там надвор'я не зробiць.
Навіны
па тэме
