Кіраўнік Мінпрама прызнаў наяўнасць «цяжкасцяў» па праходжанні плацяжоў

Крызіс адбіваюцца на працы беларускіх прадпрыемстваў, прызнаў міністр прамысловасці Беларусі Анатоль Русецкі.

«Мы вымушаныя былі прытрымаць адгрузку прадукцыі без прадаплаты. Нашы запасы знаходзяцца на ўзроўні месячнага аб'ёму вытворчасці, і мы стабілізуем сітуацыю», - заявіў А.Русецкі журналістам падчас наведвання прэм'ер-міністра краіны Сяргея Сідорскага ПА «БелАЗ», піша «Інтэрфакс».

Па словах міністра, «сусветныя фінансава-эканамічныя працэсы адбіваюцца на працы нашых прадпрыемстваў, запатрабаванасць нашай тэхнікі паменшылася».

«Таму важнейшае сёння пытанне - пашырэнне продажаў, дыверсіфікаванне рынкаў збыту, пашырэнне продажаў у краінах з закрытай эканомікай», - сказаў кіраўнік Мінпрама. Ён таксама прызнаў наяўнасць «цяжкасцяў па праходжанні плацяжоў».

А.Русецкі заявіў, што ўрадам пастаўленая таксама задача па «мінімізацыі выдаткаў, скарачэнні ўсіх невытворчых выдаткаў, эканоміі энергарэсурсаў».